Thursday, May 25th

Last update04:49:24 AM GMT

You are here:

O'zLiDep

ҲАЯЖОНЛИ ДАҚИҚАЛАР ОРТДА ҚОЛДИ

Тадбиркорлар ва ишбилармонлар ҳаракати – Ўзбекистон Либерал-демократик партияси Сиёсий Кенгаши Ижроия қўмитаси, Республика Маънавият тарғибот маркази ва Фуқаролик жамияти шаклланишини мониторинг қилиш мустақил институти ҳамкорлигида “Энг фаол либерал ғоялар тарғиботчиси” тақдимот-танловининг якуний республика босқичи бўлиб ўтди.

Унда вилоят, шаҳар ва туман босқичларида ғолиб бўлган 14 нафар иштирокчи 3 та шарт бўйича ўзаро баҳс олиб бориб, ўз билим ва малакаларини синовдан ўтказишди.

Салоҳиятли, истеъдодли, ташаббускор ва ташкилотчи тарғиботчиларни аниқлаб бераётган мазкур танлов ниҳоятда кўтаринки руҳда ўтди. Бинобарин, танлов қатнашчиларининг чиқишларини кузата туриб, шунга амин бўлдикки, фаол тарғиботчиларгина аҳолининг турли қатламлари, айниқса, ёшлар онгига давлатимизнинг ички ва ташқи сиёсати мазмун-моҳиятини, сиёсий партиялар дастурий мақсад ва вазифаларини чуқур сингдира оладилар.

Тақдимот-танлов ғолиб ва совриндорларининг фикр-мулоҳазалари билан танишиб, бунга ўзингиз ҳам амин бўласиз.




Сирожиддин ХАЛИЛОВ,
Биринчи ўрин,
Самарқанд вилояти:

– Тўғрисини айтсам, гарчи ич-ичимдан истасам-да, биринчи ўринни оламан, деб сира ўйламагандим. Ахир якуний босқичга фақат кучлилар етиб келишади. Шуни инобатга олиб, ўз устимда тинимсиз ишладим. Тақдимот-танловнинг сўнгги босқичида ҳаяжонни енгиб, бор иқтидоримни намоён этишга ҳаракат қилдим. Катта маҳорат синови бўлган мазкур танлов менда жуда илиқ таассурот қолдирди.

Мен учун муҳими, ғолиб бўлиш эмас. Асосийси, мазкур тақдимот-танлов сабаб бўлиб, сиёсий-ҳуқуқий билимларим янада ошди, дунёқарашим кенгайди, ўз устимда ишлаш кўникмаларини шакллантирдим. Дўстлар орттирдим. Улардан кўп нарса ўргандим. Шу боис мазкур танловни ташкил этишга бош-қош бўлган мамлакатимиздаги етакчи сиёсий партия ҳисобланган O‘zLiDeP мутасаддиларига алоҳида миннатдорлик билдирмоқчиман.


Комилжон ПАЙЗИЕВ,
Иккинчи ўрин,
Наманган вилояти:

– Танлов жуда ҳам ишчан, жонли, баҳс-мунозараларга бой бўлди. Унда ҳар бир иштирокчи ўз тажрибаси, тарғибот усуллари ва самаралари ҳақида сўз юритди. Мен ҳам Наманган вилоятида либерал ғояларни қандай йўл ва усулларда тарғиб қилаётганимиз, бунда ҳамкор ташкилотлар, ОАВ имкониятларидан фойдаланиш афзалликлари ҳақида тўхталиб ўтдим. Умуман олганда, танлов фаолиятимизда эътибор қаратишимиз зарур бўлган муҳим масалалар, иш услубларимиз бўйича ўзаро фикр, тажриба алмашиш имконини берди. Билмаганларимизни ўргандик, камчиликларимизни аниқлаб олдик.

Яна бир гап. Танлов иштирокчиларининг асосий қисмини ёшлар ташкил этяпти. Бу жиҳат мени жуда қувонтирди. Ўзингиз кўрдингиз, билимга чанқоқ, дунёқараши кенг, замонавий билимларга эга ёш иштирокчилар билан беллашиш осон кечмади.



Шерзодбек СУЮНОВ
Учинчи ўрин,
Сурхондарё вилояти:

– Ёш авлодни  эзгу ғоялар атрофида бирлаштириш, қизиқиш ва интилишларини қўллаб-қувватлаш, салоҳиятларини жамият равнақи йўлида сафарбар этишга рағбатлантириш партиянинг ёшлар сиёсати йўналишидаги устувор вазифаларидан саналади. Шундан келиб чиқиб, жорий йилда партия вилоят Кенгаши томонидан  коллеж битирувчилари, айниқса, уюшмаган ёшлар бандлигини таъминлаш борасида самарали ишлар олиб бордик. Бундан кўзланган мақсад вилоятда аҳолини бандлик масалаларини тўлиқ ҳал этишдан иборат. Бугунги танловда эса қатор таклиф ва ғояларим билан қатнашдим ва мутахассислардан тегишли маслаҳат олишга муваффақ бўлдим. Албатта, бу келгусидаги фаолиятимда муҳим ўрин тутади.



Баҳодир КЎЧАРОВ,
O‘zLiDeP Сиёсий Кенгаши
Ижроия қўмитаси масъул
ходими:

– Танлов самимий мулоқот ва соғлом рақобат муҳитида ўтди, деб ўйлайман. Гувоҳи бўлганингиздек, барча иштирокчилар унга яхши тайёргарлик кўришган. Улар шунчаки танловда иштирок этиш учунгина келишмаганини ҳар томонлама исботлашди. Айниқса, асосий шартларга ўтишдан аввал барча иштирокчиларнинг дўстона суҳбат асносида фикр алмашиб, ҳатто баҳс-мунозарага киришиб кетишгани бизни беҳад қувонтирди. Фикрдан фикр унади деганларидек, айнан мана шундай муҳокамалардан янги ғоялар ўсиб чиқади. Демак, партиямиз ташаббуси билан илгари сурилган тақдимот-танловдан кўзланган мақсадга озми-кўпми эришилди.

Танловнинг яна бир самарали жиҳати шундаки, унинг тафсилотлари, мамлакатимиз радио, телевидение, газета ва интернет сайтларида кенг ёритилмоқда. Бу эса жойларда партиямиз лойиҳаларига бўлган қизиқишни янада оширишга хизмат қилади. Фикримни давом эттириб, яна шуни айтмоқчиманки, биз ҳам тарғибот ишларида фаол бўлишимиз керак. Яъни, бунда ОАВ имкониятларидан, унинг кучидан унумли фойдаланган ҳолда ёшларни партиявий лойиҳа ва танловларга жалб этишимиз лозим. Ана шунда сафимизда худди бугунгидек, фаол либерал тарғиботчилар ўз-ўзидан кўпаяди. Партиямиз ғоя ва мақсадлари ҳам аҳоли орасида кенг ёйилади.





“XXI asr” мухбири
Акбар МУЗАФФАРОВ тайёрлади.
Солижон ЗОИРОВ (суратлар)

МУАММОЛАРГА ЕЧИМ ИЗЛАНЯПТИ

O‘zLiDeP Ховос тумани Кенгаши ёшлар билан иш олиб борувчи сафдошларимиз билан биргаликда давра суҳбати ўтказди. 1-умумтаълим мактабида ўтказилган ушбу тадбир келажагимиз эгаларининг бўш вақтини самарали ташкил этиш, уларнинг бандлигини таъминлаш учун тегишли ташкилотлар билан ҳамкорликни йўлга қўйиш, уюшмаган ёшларни партия тадбирларига жалб этиш сингари масалаларга бағишланди.

Олий Мажлис Қонунчилик палатасидаги O‘zLiDeP фракцияси аъзоси Комилжон Эрназаров, Ховос туман ҳокимининг ёшлар сиёсати, ижтимоий масалалар ва маънавий-маърифий ишлар бўйича ўринбосари Отабек Донобаев, шунингдек, партиямиз вакиллари мавзу юзасидан маърузалар қилишди.

Эътиборлиси, ёшлар бир қанча масалаларни тилга олдилар.  Масалан, “Етти Гузар” маҳалласида яшовчи фуқаро Гулзода Раҳмонбердиева ўзи ишга туширган “Гўзаллик салони” фаолиятига турли идоралар томонидан ноқонуний аралашувлар борлигини билдирди. Шу маҳаллада яшовчи Хуршида Нуруллаева ишсизликдан қийналаётганини айтди. Муаммоларга дуч келаётган ёшларга йўл-йўриқлар кўрсатилди, депутатлар, мутасаддиларга масалаларни ҳал этиш  вазифаси юкланди.

Тадбир ниҳоясида бир гуруҳ ёшлар партия аъзолигига қабул қилинди. Тарғибот ишларида фаол иштирок этганларга O‘zLiDeP вилоят Кенгаши томонидан совғалар тақдим этилди.

Норинисо ҚОСИМОВА,
“XXI asr” мухбири

 

ЭРТАМИЗ ЭГАЛАРИГА ЭЪТИБОР

Олий Мажлис Қонунчилик палатасидаги O‘zLiDeP фракцияси ташаббуси билан турли тадбирлар, хусусан, ёшларнинг ижтимоий-сиёсий фаоллигини оширишга қаратилган  мулоқотлар мунтазам ўтказилмоқда.

Яқинда партия Бухоро вилоят ташкилоти, ҳокимлик, “Камолот” ёшлар ижтимоий ҳаракати ҳудудий кенгаши ҳамда “Бухоро ёшлари” газетаси таҳририяти ҳамкорлигида “Халқ бой бўлса, давлат ҳам бой ва қудратли бўлади” мавзуида ёш тадбиркорлар бизнес-форуми ташкил этилди. Навқирон ишбилармонлар, инновацион ғоялар муаллифлари, ўз бизнесини бошламоқчи бўлган касб-ҳунар коллежлари битирувчилари ҳамда уюшмаган ёшлар иштирок этган мулоқотда Президентимиз Шавкат Мирзиёевнинг Олий Мажлис Қонунчилик палатаси ва Сенатининг қўшма мажлисидаги нутқида белгилаб берилган асосий вазифалар хусусида атрофлича сўз юритилди.

Форум доирасида Бухоро вилояти ҳокими, Олий Мажлис Сенати аьзоси Ўктам Барноев ва  парламентдаги  фракциямиз аъзоси Жамол Носировнинг ёшлар билан очиқ мулоқоти ташкил этилди.

Тадбирда, шунингдек, инновацион лойиҳалар кўргазмаси намойиши ҳам бўлиб ўтди.

Азиз ҲАКИМОВ,
O‘zLiDeP Бухоро вилоят Кенгаши
Ёшлар билан ишлаш бўлими мудири

 

ТАРБИЯНИНГ МУҲИМ БЎЛАГИ

Маълумки, Ўзбекистон Респуб­ликасини янада ривожлантириш бўйича  Ҳаракатлар стратегияси ҳаётимиздаги барча соҳа ва тармоқларда амалга оширилиши лозим бўлган устувор вазифаларни қамраб олган. Ана шу муҳим ҳужжат ижросини амалга ошириш мақсадида партиямиз томонидан тизимли ишлар амалга оширилмоқда. Хусусан, ёш спортчилар, давлат мукофоти совриндорлари ва халқаро танловлар ғолиблари иштирокида ёшлар билан учрашув ўтказиш ўзига хос анъана тусини олмоқда.

Яқинда O‘zLiDeP Ангор туман Кенгаши партия ҳудудий ташкилотининг ёшлар билан ишлаш бўлими томонидан “Ёшлар мустақиллик ҳимоячиси” мавзусида тадбир уюштирилди. Унда касб-ҳунар коллежлари ўқитувчи ва ўқувчилари, “Ишбилармон талаба – 2016”  кўрик-танловининг республика босқичи совриндорлари, таниқли ёш спортчилар ҳамда “Шарқ гули” маҳалласидаги уюшмаган ёшлар қатнашдилар.

Мулоқотда йигит-қизларнинг ижтимоий-сиёсий фаоллигини оширишга, ҳуқуқий-иқтисодий билимларини мус­таҳкамлашга хизмат қилувчи маърузалар ўқилди. Мустақилликнинг қадр-қиммати, беқиёс аҳамияти тўғрисида сўз юритилди. Депутатлар, спортчилар ва танлов ғолиблари ёш қизиқувчиларнинг саволларига жавоб қайтаришди. Жамиятда ўз ўрнини топишга интилаётганларга тавсия ва  маслаҳатлар берилди.

Зебинисо САПАРОВА,
O‘zLiDeP Сурхондарё вилоят
Кенгаши Ёшлар билан ишлаш
бўлими мудири

СПОРТГА ВАҚТ ТОПИНГ

O‘zLiDeP Чимбой туман Кенгаши томонидан хотин-қизларнинг бўш вақтларини мазмунли ўтказиш мақсадида спортнинг шахмат, шашка, волейбол, енгил атлетика ва теннис турлари бўйича мусобақа ўтказилди.

– Мамлакатимизда оналик ва болаликни муҳофаза қилиш, соғлом миллат генофондини асрашга катта эътибор қаратилмоқда, – дейди O‘zLiDeP Чимбой туман Кенгаши аппарат раҳбари Бекбосин Ганиев. – Соғлом онадангина соғлом болалар дунёга келади. Бугунги мусобақа хотин-қизларимизни спортга янада жалб этиш мақсадида ташкил этилди.

Тадбир якунида ғолибларга ташкилотчилар томонидан диплом ва эсдалик совғалари топширилди.

O‘zLiDeP Қорақалпоғистон Республикаси
Кенгаши Матбуот хизмати

КОЛЛЕЖДАН ТАДБИРКОРЛИК САРИ

– Айни пайтда туман бўйича 1 минг 86 нафар O‘zLiDeP аъзоларидан 292 нафарини аёллар ташкил этади, – дейди O‘zLiDeP Амударё туман Кенгаши аппарат раҳбари М. Казаков. – Бугунги тадбирдан кўзланган мақсад, хотин-қизларимизнинг тадбиркорлик соҳасидаги билим ва кўникмаларини янада ошириш, соҳага оид норматив ҳуқуқий ҳужжатлар ҳамда оилавий бизнесни ташкил этиши учун зарур қонун-қоидалар билан яқиндан таништиришдир.

Тадбир давомида маълум ютуқларни қўлга киритган тадбиркор опа-сингилларимиз билан тажриба алмашилди. Амударё туманилик “Амирхон Радха” фермер хўжалиги раҳбари, O‘zLiDeP фаоли Радха Имомаддинова 36 гектар майдонга пахта ва 4 гектар майдонга буғдой экаётгани, жорий йилда 2 гектар майдонга узумчилик  ва қуёнчиликни ривож­лантиришни йўлга қўйгани ҳақида тўхталиб ўтилди.

Давра суҳбати сўнгида коллежни битираётган ўқувчиларнинг бизнес-режалари муҳокама қилинди, тегишли йўл-йўриқ, тавсиялар берилди.

O‘zLiDeP Қорақалпоғистон
Республикаси
Кенгаши матбуот хизмати

ШИФОКОР НАЗОРАТИДА

Пастдарғомликлар бепул тиббий кўрикдан ўтишмоқда. Туман тиббиёт бирлашмаси патронаж ҳамда марказий шифохона ҳамширалари, умумий амалиёт шифокорлари, тор мутахассислар 7 195 нафар турли ёшдаги фуқароларни текширишганда уларнинг 3 386 нафарида турли касалликлар борлиги аниқланди.

Бу  ҳақда O‘zLiDeP Самарқанд вилоят Кенгаши Пастдарғом тумани тиббиёт бирлашмаси билан ҳамкорликда ташкил этган  давра суҳбатида маълумот берилди.

Партиянинг “Соғлом оила – мустаҳкам оила” ло­йиҳаси доирасида  ташкил этилган ушбу тадбирда иштирок этган депутатлар, партия фаоллари, бош­ланғич партия ташкилотлари аъзолари, тиббиёт ходимлари юртимизда амалга оширилаётган кенг кўламли ислоҳотлар натижасида тиббий хизмат сифати ошаётгани, аҳоли саломатлигига алоҳида эътибор қаратилаётганини таъкидлашди.

Туман тиббиёт бирлашмаси бошлиғининг ўринбосари Феруза Мустафаеванинг айтишича, беморлар тўлиқ шифокорлар назоратига олинди ва уларнинг саломатликларини тиклаш чоралари кўрилади.





Муҳаббат РАВШАНОВА,
“ХХI asr” мухбири

НУҚСОНЛАРДАН ХУЛОСАЛАР ЧИҚАРИЛЯПТИ

Ҳозирда Бухоро вилоятида 18 минг 457 нафар O‘zLiDeP аъзосини бирлаштирган 639 та бошланғич ташкилот фаолият кўрсатяпти. Ҳудуддаги маслакдошларимизнинг 7635 нафари  фермер, тадбиркор, шунинг­дек, ишлаб чиқариш ва хизмат кўрсатиш соҳасида ишлаётган юртдошларимиздан иборатлиги эътиборга молик. Албатта, сиё­сий куч учун сон ҳам муҳим. Лекин гап фақатгина миқдорда эмас. Гап шундаки, яқинда бўлиб ўтган ҳисобот-сайлов йиғилиш­лари қуйи бўғинларнинг вилоят ижтимоий-сиёсий ҳаётида ўзига хос ўрин эгаллаб бораётганини кўрсатди.

Даставвал шуни қайд этиш зарурки, мазкур жараёнда зиммасига юклатилган вазифаларни сидқидилдан бажарётган БПТ етакчиларига яна ишонч билдирилди. Масалан, Бухоро шаҳридаги “Саломатлик маскани” шифохонаси, “Шохруд” акциядорлик жамияти, “Ўзбектелеком” АК шаҳар телекоммуникация боғламаси, “Бухоро халқаро аэропорти” унитар корхонаси, вилоят марказидаги А. Ғиждувоний номли маҳалла фуқаролар йиғини ҳудудидаги таянч тузилмалар энг намуналилар қаторида эътироф этилди. Ана шу сингари фаол қуйи тузилмалар ўтган йили партия маҳаллий Кенгашлари ва депутатлар билан ҳамкорликда жойлардаги айрим муаммоларни ҳал этишга кўмаклашдилар. Масалан, Ромитан туманидаги салкам 4 минг аҳоли истиқомат қилаётган “Ҳазортут” МФЙ ҳудудида мактабгача таълим муассасасини барпо этиш кўп йиллардан буён пайсалга солиб келинётган эди. Маҳаллада тузилган бошланғич ташкилот фаоллари саъй-ҳаракати билан мазкур масалага Халқ депутатлари вилоят Кенгашига партиямиздан сайланган депутатлар эътибори қаратилди. Пировардида муаммо ижобий ечим топди. Шунингдек, Шофиркон туманидаги “М.Чандир”, Қоракўл туманидаги “Эски қалъа”  ва  “Сайёт”  қишлоқ фуқаролар йиғинлари ҳудудларида фаолият кўрсатиб келаётган таянч тузилмалар  депутатлар – Ж. Жалилов, У. Ҳасанов, Ю. Рўзиев билан бирга самарали иш олиб борганликлари натижасида  ҳисобот даврида жойларни ободонлаштириш ва кўкаламзорлаштириш, экин майдонларининг мелиоратив ҳолатини яхшилаш, фермер хўжаликларини маҳаллий ўғит, сув, ёқилғи-мойлаш материаллари ва бошқа ресурслар билан таъминлаш масалалари ўз вақтида ҳал этилди.

Умуман, вилоятдаги ишчан, партиявий бурчга масъулият билан ёндашадиган 557 нафар қуйи бўғин раиси қайта сайланди. 61 етакчи  иш ёки яшаш жойи ўзгаргани, саломатлиги ёмонлашгани ва бошқа шу каби сабабларга кўра ихтиёрий равишда таянч тузилмага раҳбарлик қилишдан воз кечдилар.  Ишлар ўз ҳолига ташлаб қўйилган, номигагина мавжуд бўлиб турган 7 та БПТ раҳбари эса алмаштирилди. Масалан, Бухоро туман тиббиёт бирлашмасидаги қуйи тузилма етакчиси томонидан ўтган йил давомида партияга бирорта ҳам янги аъзо қабул қилинмаган, йиғилишлар, ғоявий-сиёсий тадбирлар ўтказишга ҳам бефарқ қаралган. Қисқаси, БПТ фаолияти қониқарсиз баҳоланди. Мазкур бошланғич ташкилот фаолиятини яхшилаш мақсадида унга серғайрат ва билимдон сафдошимиз  Умиджон Ҳамроев раисликка сайланди. Яна 6 та ана шундай таянч тузилма эндиликда янги етакчилар билан иш юритяпти.

Партиямиз дастурий ғоя ва мақсадларининг жамиятда устуворлик касб этишида тарғибот ишлари алоҳида ўрин тутиши маълум. Ҳисобот даврида айнан бошланғич ташкилотлар ташаб­буси билан  кўплаб  тадбирлар ўтказилди. Уларда депутатлар, шунингдек, тадбиркорлар, фермерлар билан иш олиб борувчи турли ташкилотлар мутахассислари, таниқли ишбилармонлар, партия фаоллари иштирок этгани эса муайян самарадорликни таъминлади. Хусусан, учрашув ва мулоқотларда Президентимизнинг кичик бизнес ва хусусий тадбиркорликни ривожлантиришга оид фармон ва қарорлари мазмун-моҳияти тўғрисида сўз юритилди. Когон, Шофиркон, Вобкент, Жондор, Ғиждувон, Бухоро сингари шаҳар ва туманларда ўз бизнесини бошлаш арафасида турган  йигит-қизлар учун ўтказилган тадбирлар ҳам иштирокчиларга манзур бўлди. Фуқаролик жамияти шаклланишини мониторинг қилиш мустақил институти, Бухоро давлат университети қошидаги 4-сон академик лицей, Бухоро туманидаги “Галаосиё” МФЙ, ”Гала-Ривер” қўшма корхонаси  ва бошқа  бир қатор  ташкилот ва муассасаларда уюштирилган мулоқотларда маҳаллий кенгашларнинг депутатлари, тадбиркорлар, фермерлар қатнашиб, муҳокама этилаётган масалалар бўйича ўз фикр-мулоҳазаларини билдирдилар.

Шуниси диққатга сазоворки, ҳисобот-сайловлар давомида 2017-2021 йилларда Ўзбекистон Республикасини ривожлантиришнинг 5 та устувор йўналиши бўйича  Ҳаракатлар стратегиясида белгилаб  берилган вазифалар ва уларнинг ҳудудлардаги ижроси юзасидан ҳам атрофлича фикр алмашилди. Партия аъзоларининг вазифалари белгилаб олинди.

Ўтган йили кўпгина пешқадам қуйи бўғинлар етакчилари юқори партия ташкилотлари томонидан рағбатлантирилган. Чунончи,  Қоракўл тумани марказий касалхонаси  ҳамда  ушбу тумандаги “Хўжалар” МФЙ  ҳудудида ташкил этилган БПТ,  шунингдек, Шофиркондаги 30 дан ортиқ таянч бўғин етакчилари фахрий ёрлиқлар, ташаккурнома ва эсдалик совғалари билан тақдирландилар. Бироқ  барча муносиб етакчилар ана шундай эътибордан баҳраманд бўляпти, дейиш қийин. Бу борадаги ишларни қайта кўриб чиқиш вақти етди.

– Сарҳисоб жараёнидан тегишли хулосалар чиқардик, – дейди O‘zLiDeP вилоят Кенгашининг ташкилий-партиявий ишлар бўлими мудири Мавжуда Рашидова. – Жумладан, бошланғич ташкилотларда партиявий фаолиятга доир ҳужжатлар билан ишлашни яхшилаш зарур. Таянч нуқталарни кенг мушоҳада юрита оладиган, аниқ фуқаролик позициясига эга одамлар, хусусан, ёшлар билан мустаҳкамлашга янада кўпроқ эътибор бериш керак. Афсусланарлиси, баъзи сабабларга кўра ҳанузгача махсус хонага эга бўлмаган қуйи бўғинлар бор. Айрим БПТлар эса талаб даражасида жиҳозланмаган, мослаштирилмаган хоналарда фаолият олиб боряпти.

“Ғиждувон Машҳураси” хусусий корхонаси раҳбари, БПТ раиси, Халқ депутатлари Бухоро вилоят Кенгаши депутати Замира Сафарованинг фикрига кўра, ҳисобот-сайлов йиғилишлари давомида билдирилган асосли таклифлар айтилган жойида қолиб кетмаслиги лозим. Бир қарашда амалга татбиқ қилиниши унчалик ҳам мушкул туюлмайдиган таклифларнинг амалга ошиши молиявий масалалар билан ҳам чамбарчас боғлиқлигини ҳисобга олиш керак. Қуйи тузилмаларни зарур адабиётлар, қўлланмалар билан таъминлаш, уларнинг тегишли нашрларга обуна бўлиши, БПТ хоналарини замонавий тарзда жиҳозлаш, махсус телекўрсатувлар ташкил этиш шулар жумласидандир.

– Гарчи ҳисобот-сайловларда туманимиздаги 52 та қуйи тузилма фаолияти қониқарли, деб топилган бўлса-да, бош­ланғич ташкилотларнинг ҳар жиҳатдан мукаммаллигига эришиш учун ҳали кўп тер тўкишимиз керак, – дейди O‘zLiDeP Вобкент туман Кенгаши аппарати раҳбари Бозор Одилов. – Хусусан, таянч бўғинлар томонидан ўтказилувчи тадбирларни шакл ва мазмун жиҳатдан қайта кўриб чиқишимиз тақозо этилётир. БПТ раисларининг сиёсий билимини нафақат партия вилоят ташкилоти ҳузуридаги Сиёсий таълим маркази томонидан уюштирилувчи ўқувлар, балки туман миқёсида ташкил этилувчи  машғулотларда ҳам ошириш мақсадга мувофиқ, деб ўйлайман. Бу борадаги фикр-мулоҳазаларимни тартибга келтириб, партия вилоят Кенгашига тақдим этганман.

Асхор  ИСТАМОВ,
Беҳзод ИСРОИЛОВ
“XXI asr” мухбирлари

ҲИСОБОТ-САЙЛОВ САБОҚЛАРИ

бошланғич ташкилотларда икки ой мобайнида ўтказилган сарҳисоб
йиғилишлари партия таянч нуқталари фаолиятини янги сифат босқичига олиб чиқиш зарурлигини кўрсатди

 

Халқ ишончини қозониш, аҳоли ўртасида юксак нуфузга эга бўлиб, жамиятнинг муайян қатламларини ўз ғоялари атрофида бирлаштиришга интилаётган сиёсий партия олдида биргина йўл бор. У ҳам бўлса, одамлар орасига чуқурроқ кириб бориш, электорат билан доимо ҳамнафас бўлишдир. Бошланғич партия ташкилотларисиз эса ушбу вазифани уддалаш ғоят мушкул. Айтайлик, ҳатто партия аъзоларини ҳисобга олиш ҳам қуйи бўғиндан бошланади. Сиёсий кучнинг юқори органи қарорлари амалга оширилиши, депутатлик гуруҳи самарали фаолият юритиши учун зарур маълумотлар тўпланиши, партия конференцияларига делегатлар сайланиши, тарғибот-ташвиқот ишлари ва бошқа кўпгина жараёнларни таянч тузилмалар иштирокисиз тасаввур қилиш мумкин эмас.

 

Таъкидлаш керакки, Ўзбекистон Республикасини янада ривожлантириш бўйича Ҳаракатлар стратегиясида белгиланган устувор йўналишлар давлатимиз раҳбарининг “Халқ бой бўлса, давлат ҳам бой ва қудратли бўлади” деган эзгу даъватини ҳаётимизга жорий қилишга қаратилган. “Иқтисодиётни янада ривожлантириш ва либераллаштириш” номли учинчи йўналиш ана шу мақсад рўёбга чиқишини таъминлайдиган олтита аниқ вазифадан иборат. Улар орқали мамлакатимизда янада қулай, янада эркин ишбилармонлик муҳитини яратиш мақсади илгари суриляпти. Ушбу муҳим йўналиш соҳада мутлақо янги босқични бошлаб берди. O‘zLiDeP тарихий аҳамиятга молик, ўз дастурий вазифаларига ҳамоҳанг ана шу ҳужжатни дастуриламал, бундан кейинги партиявий фаолиятнинг асос-негизи сифатида қабул қилди. Шунинг баробарида Президентимизнинг партия VIII съездидаги маърузасида баён қилинган муҳим вазифалар ҳам таянч нуқталар зиммасига янги-янги вазифаларни юкламоқда. Шундай экан, сиёсий кучнинг мазкур муҳим бўғини фаолияти бугунги давр талаблари даражасидами?  БПТ сайловчилар билан партия ўртасида ишончли кўприк бўла олаяптими?  Яқинда поёнига етган ҳисобот-сайлов йиғилишлари мазкур долзарб саволларга муфассал жавоб қайтариш, бошланғич ташкилотларнинг нечоғлик ишчанлиги, ташаббускорлиги ҳақида муайян хулосалар  чиқариш учун асос яратиб, уларни бундан-да такомиллаштиришнинг янгича усул ва тамойилларини белгилаб берди.

 

 

ТАЙЁРГАРЛИК ПУХТА БЎЛСА...

 

Аввало шуни қайд этиш зарурки, ҳисобот-сайловларни ўтказишда ўтган йилларда мазкур жараёнда кўзга ташланган айрим камчиликларга деярли йўл қўйилмади. Хусусан, тадбирларга тадорик бир неча ҳафта илгари бошланди. Тегишли ахборотлар тарқатма материал ва бошқа воситалар орқали имкон қадар кечиктирилмай, ўз вақтида жойларга етказилди. Бу йилги ҳисобот-сайлов йиғилиш­ларида БПТ тузилган корхона, муассасалар раҳбариятининг ҳам қатнашишига алоҳида урғу берилди. Шунингдек, мазкур тадбирлар учун ҳар томонлама қулай, етарлича жиҳозланган жойлар танланишига ҳаракат қилинди. Яна бир диққатга сазовор жиҳат шу бўлдики, ҳисобот-сайлов даврида бошқа партиявий тадбирлар сони имкон қадар камайтирилди.

 

 

ДОЛЗАРБ САВОЛГА ЖАВОБ

 

O‘zLiDeP Сиёсий Кенгаши Ижроия қўмитасининг бошланғич ташкилотлар билан ишлаш сектори ходими Сардор Маликовнинг маълум қилишича, ҳисобот-сайловларда барча қуйи бўғинларнинг фаолияти атрофлича таҳлил этилиб, истиқболдаги асосий вазифалар белгилаб олинди. Масъулиятли жараёнда партиянинг 265 мингдан зиёд аъзоси ва тарафдорлари, жумладан, 900 нафардан зиёд депутат, шунингдек, нодавлат ва жамоат ташкилотлари, фуқароларнинг ўзини ўзи бошқариш органлари вакиллари, бевосита хусусий сектор билан ишловчи тузилмалар ходимлари, тадбиркор ва фермерлар иштирок этди. Йиғилишларда “2016 йили БПТлар қандай ютуқларга эришди, зиммасидаги вазифаларни қай даражада бажара олди?” деган асосий саволга жавоб берилар экан, даставвал, партиямиз ғояларини, мақсадларини қўллаб-қувватловчилар тобора кўпаяётгани тилга олинди. Дарҳақиқат, ўтган йил мобайнида 64515 нафар юртдошимизга O‘zLiDePга аъзолик гувоҳномалари топширилди. Бу эса олиб борилган тарғибот ишлари қанчалик таъсирчан бўлганини кўрсатиши билан бирга либерал-демократик ғояларнинг ниҳоятда ҳаётий ва халқчил эканлигини  яна бир бора намойиш этаётир.

 

Ҳисобот даврида БПТлар ҳам сон, ҳам сифат жиҳатдан ўсишга эришди. 998 та янги таянч тузилмага асос солинди ва жорий йил 1 апрель ҳолатига жами бошланғич ташкилотлар сони 10886 тани ташкил этди. Эътиборга молик томони, ҳисобот-сайлов даврида тузилган 254 та қуйи тузилманинг 55 фоизи хусусий субъектларда фаолият юритяпти. Бошқача айтганда, хусусий сектор вакиллари ўртасида партия илгари сураётган ғоялар моҳиятини тарғиб-ташвиқ қилиш кўлами янада кенгайди. Айниқса, самарқандлик маслакдошларимизнинг зиммаларидаги вазифаларга масъулият билан ёндашаётганликлари яққол кўзга ташланди – ҳисобот даврида вилоятда 47 та янги БПТга асос солинди. Партиявий тадбирларда фаол қатнашиб, таянч тузилмалар орасида ўзаро тажриба алмашиш, эришилган ютуқларни оммалаштириш, фаолликни кучайтиришга қаратилган асосли таклифлар билдирган, ташкилотчилиги ва бош­қа фазилатлари билан маслакдошлари ҳурматини қозонган сафдошларимизнинг 1836 нафари O‘zLiDeP раҳбар кадрлар захирасига олинди.

 

Маълумки, қуйи ташкилот мурожаатлар билан изчил иш олиб бориши, баъзи масалаларга депутат, мутасадди идоралар ҳамда жамоатчилик нигоҳини қаратиш билан шуғулланишлари керак. Ижроия қўмитанинг “БПТлар томонидан жойлардаги ижтимоий-иқтисодий ва бошқа муаммоларни ўрганиш ва уларни партиявий воситалар орқали ҳал этиш тўғрисида”ги қарори ва бу борадаги йўриқномаси БПТларнинг бу йўналишдаги фаолиятини бир неча йилдан буён мувофиқлаштиряпти. Шу билан бирга икки йил муқаддам маҳаллий Кенгашлар депутатлари қуйи тузилмаларга бириктирилган эди. Яратилган ана шу имкониятларга қарамай, бу йўналишда – энг муҳим йўналишларнинг бирида – ҳали-ҳануз оқсаш кузатилаётганини таассуф билан айтиш керак. Бошқача айтганда, асосий электоратимиз манфаатларини ифодалаш билан боғлиқ ишлар изчил, тизимли ва самарали тус олгани йўқ. Бошланғич ташкилотларнинг бу борадаги фаолиятини такомиллаштириш учун тегишли чора-тадбирлар ишлаб чиқилаётганини таъкидлаш лозим.

 

 

ҒАЛВИР СУВДАН КЎТАРИЛГАНДА...

 

Бўлиб ўтган муҳим тадбирларда БПТ етакчилари ва аъзоларининг сифат таркибини янада яхшилаш масаласига эътибор қаратилди. Ваколатларидан оқилона фойдаланиб, жойларда партия мавқеини мустаҳкамлашга муносиб ҳисса қўшаётган 9240 та қуйи бўғин раиси қайта сайланди. Шунингдек, 1429 та таянч нуқта эндиликда янги етакчилар билан ишини давом эттирадиган бўлди. Бундан ана шу бошланғич ташкилотлар раислари яхши ишламагани учунгина алмаштирилди, деган хулоса чиқмаслиги керак. Кимдир иш жойи, кимдир яшаш жойи ўзгаргани учун, яна кимдир пенсияга чиққани ёхуд саломатлиги важидан, баъзилар эса ўз ихтиёри билан қуйи ташкилот етакчилигидан воз кечдилар. Айни пайтда 483 нафар масъулиятсиз, лоқайд етакчига ишонч билдирилмади. Мисол учун, Зарафшон шаҳридаги “Ёшлик” маҳалла фуқаролар йиғини ҳудудидаги БПТ ўтган йил давомида партия сафига янги аъзоларни жалб қила олмаган.  Бирор марта йиғилиш ёки ғоявий-сиёсий тадбир ўтказилмаган. Партия шаҳар Кенгаши ҳамда депутатлар билан алоқалар деярли узилиб қолган. Қуйи тузилма аъзоларининг боши қовушмаган – улар ўртасида тарқоқлик вужудга келган. Йиғилишда шу сингари нуқсонлар очиқ-ошкора айтилиб, мазкур ташкилотга сафдошимиз Алишер Суюнов етакчи этиб сайланди. У Навоий давлат кончилик институтини тамомлаган. 6 йилдан буён Зарафшон саноат касб-ҳунар коллежида  ўқитувчилик қиляптики, бу унинг ёшлар билан ишлаш бўйича муайян тажрибага эга эканидан далолат. “Камолот” ЁИҲ фаолларидан. Маслакдошлар унинг ишчанлиги, ташкилотчилиги, ўзгалар дардини ўз дарди деб ҳисоб­лаши каби талай фазилатларини эътироф этдилар.

 

Наманган вилоятида энг кўп – 169 та қуйи бўғин раиси ўзгарди. Бу эса ҳудуддаги жами қуйи бўғинларнинг 20 фоизи демакдир. Демак, ҳисобот-сайловлар кутилган натижани берди, халқона айтганда, “ғалвир сувдан кўтарилди”. Шу билан бирга, холисона мушоҳада юритилса, наинки БПТ аъзолари, балки туман ва шаҳар партия ташкилотлари мутасаддиларининг эътиборсизлиги охир-оқибат ана шу ҳолатни юзага чиқарди.

 

Аҳамиятлиси,  янги раисларнинг 632 нафари ҳамда ҳисобот-сайловлар мобайнида партия сафига қабул қилинган 23 мингдан зиёд юртдошимизнинг деярли 60 фоизи навқирон авлод вакилидир. Бу O‘zLiDePнинг собитқадамлик билан ёшлар учун ижтимоий кўтаринкилик муҳитини яратишга, уларнинг ижтимоий-сиёсий истиқболини бунёд этишга йўналтирилган саъй-ҳаракатлари самарасидир. Зеро, партия фаолиятини, хусусан, бошланғич ташкилотлар ишини такомиллаштириш юзасидан билдирилаётган асосли таклифларнинг аксариятини ёш етакчилар ва аъзолар илгари сураяпти.

 

 

Асосли таклиф ва мулоҳазалар

 

Шу хусусда гап очилган экан, жорий йилдаги ҳисобот-сайловлар пайтида аввалгиларидан фарқли равишда жуда кўп асосли таклифлар илгари сурилганини мамнуният билан қайд этиш жоиз. Айтайлик, андижонлик сафдошларимиз бошқа мурожаатлар қаторида Сиёсий Кенгаш Ижроия қўмитаси томонидан “O‘zLiDeP фидойиси” кўкрак нишони таъсис этилиши ва у билан партиявий фаолиятда жонбозлик кўрсатаётган сафдошларимизни тақдирлаш йўлга қўйилиши айни муддао бўлиш таклифини билдирдилар. Самарқанд вилоятидаги партиядошларимиз эса БПТ раислари учун услубий-амалий қўлланмалар тайёрлаш зарурлиги тўғрисида фикр билдирдилар. Таянч бўғин етакчиларини моддий ва маънавий рағбатлантиришга оид таклифлар ҳам кўп. “БПТ раислари куни”ни ўтказиш, чорак якунлари бўйича энг муносиб бошланғич ташкилотларга турли мукофотлар бериш шулар жумласидандир. Пойтахтимиздаги БПТлар йиғилишларида ҳисобот-сайловларни видеомулоқотлар тарзида уюштириш, умуман, бу тадбирларда янги технологиялардан кенг фойдаланиш, шунингдек, ҳар бир туманда ўртача 90-100 та қуйи бўғин фаолият юритаётгани туфайли партия туман Кенгашларидаги ходимлар сонини ошириш каби фикрлар айтилди.

 

Мавриди келганда шуни ҳам баён этиш жоиз: ўтган йили тажриба тариқасида “Меҳнатни муҳофаза қилиш тўғрисида”ги Ўзбекистон Республикаси қонуни лойиҳаси қарийб ҳар бир БПТда муҳокама қилинганди. Тажриба ўзини оқлади. Лойиҳа юзасидан талай таклиф ва тавсиялар олинди. Уларнинг айримлари қонунда ўз ифодасини топди. 2017 йилда бундай амалиёт кенгроқ қўлланилиши мўлжалланмоқда. Яна бир янгилик: эндиликда депутатлик гуруҳларининг туман (шаҳар)ни ижтимоий-иқтисодий ривожлантириш дас­тури юзасидан ўтказадиган йиғилишларида таянч тузилмалар етакчилари ҳам қатнашиб, кун тартибидаги масалалар бўйича ўз мулоҳазаларини билдирадилар.

 

ТАФТИШЛАР НАТИЖАЛАРИ

 

Бу йилги ҳисобот-сайловларда партия туман ва шаҳар бўлимлари илк бора БПТларни тўлиқ тафтишдан ўтказиш, партия аъзолари сонини қайтадан кўриб чиқиш, улар сафини ёш, иқтидорли, ташаббускор инсонлар ҳисобига кенгайтириш, қоғоздагина мавжуд бўлиб қолаётган таянч нуқталарга (яъни, фаолиятини тўхтатган катта-ю кичик корхона ва ташкилотлардаги  қуйи тузилмаларга) барҳам бериш масалалари билан жиддий шуғулландилар. Натижада 77 та БПТ тугатилди. 228 нафар партия аъзоси эса турли сабабларга кўра, хусусан, O‘zLiDeP Устави талабларини бажармаганлиги учун ҳисобдан чиқарилди. Шунингдек, 174 қуйи ташкилот фаолияти қайта тикланди.

 

Ҳисобот-сайловларда қўлга киритилган муваффақиятлар қайд этилиши баробарида қатор хато-камчиликлар борлиги ҳам тан олинди. Чунончи, ички имкониятлардан, берилган ваколатлардан етарлича фойдалана билмаслик, айрим партия аъзоларининг ижтимоий масъулиятни чуқур ҳис қилолмаслиги шулар жумласидандир.

 

Хулоса сифатида шуни айтиш мумкинки, ҳисобот-сайлов йиғилишлари БПТларнинг ҳақиқатан ҳам партиянинг таянч нуқталарига айланаётганини  кўрсатди. Гарчи муайян камчиликларга йўл қўйилган бўлса-да, мазкур жараён юқори савияда ўтди, дейиш мумкин. Галдаги вазифа эса муваффақиятларни мустаҳкамлаш, нуқсонларни тузатиш, партия фаолиятида БПТлар салоҳиятидан тўла-тўкис фойдаланиш, бу жараёнда ҳар бир сафдошимиз масъулиятини янада кучайтиришдан иборат.

 

Беҳзод ИСРОИЛОВ,
“XXI asr” мухбири

САЙЛОВЧИ – ДЕПУТАТ: ютуқлар ўз йўлига, муаммоларга ечим излайлик!

Парламент – халқ ҳокимияти ҳисобланади, зеро, унинг фаолиятида аҳоли ўзи сайлаган вакиллари орқали иштирок этади. Билвосита вакил эса депутатдир. Демак, депутатларнинг аҳоли билан тез-тез жонли мулоқотларда бўлиб, уларнинг дард-у муаммоларига қулоқ тутиб, мақбул ечим топиш йўлида амалий чоралар кўришидан ҳамма ютади: жамият ҳам, фуқаро ҳам.

САМАРҚАНД

Халқ дарди, қувончу ташвишларига шерик бўлиш, одамларнинг оғирини енгил қилиш йўлидаги ибратли ишларни давом эттириш мақсадида Олий Мажлис Қонунчилик палатасидаги O‘zLiDeP фракцияси аъзолари айни пайтда вилоятнинг Каттақўрғон туманида аҳоли ҳузурида бўлиб туришибди. Депутатларимиз режа асосида маҳаллий кенгашлар депутатлари билан ҳамроҳликда гуруҳларга бўлиниб, фаол иш олиб боришаётир. Эътиборлиси, катта-кичик муаммоларнинг барчаси атрофлича таҳлил қилингандан сўнг қисқа фурсатда ҳал этиляпти. Ишга бундай ёндашув эса одамларнинг оғирини енгил, мушкулини осон қилишга хизмат қилаяпти, десак сира муболаға бўлмайди.

– Каттақўрғонга келганимиздан буён кўплаб хонадонларга кирдик.  Юртдошларимиз билан дилдан суҳбатлашдик. Бунинг натижасида ижросини кутиб турган кўплаб масалалар юзага чиқмоқда, – дейди Олий Мажлис Қонунчилик палатасидаги O‘zLiDeP фракцияси аъзоси, Аграр ва сув хўжалиги масалалари қўмитаси раиси Тўлқин Эшназаров. – Биргина “Мўминхўжа” маҳалла фуқаролар йиғинида бўлганимизда йиллар давомида одамларни қийнаб келаётган бир нечта муаммолар ўз ечимини топди. Хусусан, электоратимиз вакили, тадбиркор Шаҳруз Йўлдошевга фаолият юритиши учун банк терминали зарур экан. Унинг талаби тезда қондирилди. Шунингдек, маҳалладаги трансформаторларнинг аллақачон таъмирталаб аҳволга келиб қолгани ва бу борада бир неча бор тегишли идораларга мурожаат қилинган бўлса-да, иш ортга суриб келинаётгани маълум бўлди. Мазкур масалани ижобий ҳал этиш учун туман электр тармоқлари корхонасига мурожаат этдик ва дастлабки ҳаракатлар бошлаб юборилди. Умуман олганда, ҳаммани бирдек ўйлантираётган муаммолар жойида ўрганилиб, уларни имкон қадар ижобий ҳал этишга ҳаракат қиляпмиз.

Бу галги учрашувларда эътиборимни тортган жиҳатлардан бири, борган сари аҳолининг мурожаат маданияти даражаси ҳам, айтиш керакки, босқичма-босқич юксалиб бормоқда. Бугун сайловчилар бизга фақат ижтимоий-маиший ёки шахсий масалалар юзасидан мурожаат қилиш билан чекланмаяпти. Эндиликда улар бизга мамлакатимизда амалга оширилаётган ислоҳотларнинг бориши, Президентимиз томонидан қабул қилинаётган фармон ва қарорларнинг мазмун-моҳияти, муҳокама қилинаётган қонун лойиҳалари тўғрисида асосли саволлар ҳам беришмоқдаки, бу ҳолат бизни ўз устимизда янада кўпроқ ишлашга, изланишга ундамоқда. Бу эса парламентда қабул қилинаётган қонунларнинг янада пишиқ ва пухта тайёрланишига хизмат қилади.

Дарҳақиқат, бугунги сайловчи кечаги сайловчи эмас. Баландпарвоз гаплар энди беҳуда. Бошқача айтганда, сайловчилар ишончини қозониш, уларнинг қўллаб-қувватлашига эришиш кўп жиҳатдан жойларда учраётган турли масалаларни самарали ҳал қилиш, электорат манфаатларини таъминлаш йўлида аниқ натижага эришишга боғлиқ. Шу маънода депутатларимиз халқ ичига чуқурроқ кирган ҳолда улар билан елкама-елка туриб муаммоларни ўз жойида, ўз вақтида ҳал этишга интилмоқдалар.

Муҳаббат РАВШАНОВА,
“XXI asr” мухбири

АНДИЖОН

Шу кунларда O‘zLiDePдан Олий Мажлис Қонунчилик палатасига сайланган депутатлар Андижон вилоятининг Қўрғонтепа туманида ўтказилаётган жонли мулоқотларда фаол иштирок этишяпти. Улар туманнинг ўнлаб аҳоли пунктида бўлиб, маҳаллий давлат органлари, маҳалла фуқаролар йиғини, ижтимоий соҳа мутасаддилари фаолиятини ҳамда аҳоли турмуш шароитини ўргандилар. Натижада фуқаролардан тушган 224 та мурожаатнинг 22 тасини ўз жойида ҳал этишга эришилди, қолган муаммоларга вилоят ва республика даражасида ечим топиш юзасидан чоралар белгиланди.

– Мурожаатларнинг аксариятини уй-жой, коммунал, аҳоли бандлиги, пенсия ва нафақа таъминоти масалалари ташкил этмоқда, – дейди Олий Мажлис Қонунчилик палатасидаги фракциямиз аъзоси Тўлқинжон Каримов. – Бундан кўринадики, жойларда айнан шу соҳаларда муаммолар кўпроқ. Бугун фуқароларнинг дунёқараши ўзгарган. Улар жамиятдаги ўзгаришларга бефарқ эмас. Бундан фақат хурсанд бўлмоқ лозим. Чунки, фаоллик мавжуд муаммоларга ечим топишда алоҳида аҳамият касб этади.

– Депутатлар ташрифидан хурсанд бўлдик, – дейди Устоз маҳалласи, Мактаб кўчасида яшовчи Зулхумор Юсупова. – Ўғлим Илҳомжон  кредит олиб, тадбиркорлик фаолиятини бошламоқчи эди. Шу масалада  мурожаат қилдим. Вазият билан танишган парламент аъзолари мутасадди вакиллар билан бирга амалий ёрдам беришди.

Истиқлол маҳалласининг Шарқ кўчасида истиқомат қилувчи Анваржон Мамадалиев 1-гуруҳ ногирони. Ҳолатни ўрганган ишчи гуруҳ аъзолари унинг пенсиясини хонадонга келтириб бериш лозимлигини таъкидлаб, бу борада амалий кўмак беришди.

Нозимжон Маҳмудов Дардоқтепа маҳалласининг Беруний кўчасида яшайди. Унинг  муаммоси ҳам банкдан кредит олишга бориб тақалади. Бу ҳам шу жойнинг ўзида ҳал этилди. Яқин кунларда Нозимжон кредит маблағи эвазига автомобилларга  техник хизмат кўрсатиш шохобчаси фаолиятини йўлга қўяди. Бундан ташқари, шу маҳалладаги 5 та хонадон эгаларининг суюлтирилган газ баллонлари таъминотидаги сўровлари ҳам ечимини топди.

Мулоқотлар доирасида маҳаллий ўзини ўзи бошқариш органлари фаолияти ҳам атрофлича ўрганиляпти. Чунки мурожаатларнинг аксарияти маҳалла фуқаролар йиғинлари фаолиятлари қониқарли йўлга қўйилмаётгани оқибатида келиб чиқяпти. Камчиликларни бартараф этиш учун 26 та маҳалла фуқаролар йиғинлари фаолияти ўрганилди, керакли тавсия ва кўрсатмалар берилди. Шунингдек,  тиббиёт, таълим, транспорт хизмати, йўл қурилиши соҳалари ҳам атрофлича ўрганилиб, мавжуд муаммоларнинг ижобий ечим топиши имкониятлари ўрганилмоқда.

Зилола РАҲМОНОВА,
“XXI asr” мухбири

ҚАШҚАДАРЁ

Парламент қуйи палатасидаги партиямиз фракцияси аъзолари Қаҳрамон Эргашев, Гулшана Худоёрова ва Ўткир Бўтаевлар ҳам Қарши тумани аҳолиси билан қизғин мулоқот олиб бормоқдалар. Депутатларимиз дастлаб Чароғил, Дашт қишлоқ, Хониён маҳалла фуқаролар йиғини ҳудудидаги қишлоқлар хонадонларида бўлиб, аҳоли бандлиги ва фаровонлиги йўлида қилинаётган ишлар билан атрофлича танишдилар.

– Икки кун мобайнида 150 дан ортиқ хонадонга кириб чиқдик, – дейди Олий Мажлис Қонунчилик палатаси депутати Ўткир Бўтаев. – 30 га яқин ижтимоий объектлар фаолиятини ўргандик. Аҳоли томонидан қилинаётган мурожаатлар электр ва газ, ичимлик сув таъминотини яхшилаш, йўлларни таъмирлаш борасида бўлмоқда. Ўтган вақт мобайнида, шунинг­дек, чорвачилик, паррандачилик, қуёнчилик, боғдорчилик, лимон кўчатларини етиштириш, сақлаш, парваришлаш, етказиб бериш каби фаолият билан шуғулланиш учун кредит сўраб мурожаат этган 15 нафар фуқаронинг бизнес лойиҳалари билан танишдик ва кредит олишда кўмак­лашяпмиз.

– Кўп йиллардан буён томорқамизда сабзавот экинлари етиштириш биз учун орзу бўлиб келаётганди, – дейди “Дашт” маҳалла фуқаролар йиғини ҳудудидаги Хониён қишлоғида яшовчи Ибрат Бегимқулов. – Чунки оқова сув қишлоғимизга берилмасди. Катта-катта майдонлар тиконзор бўлиб ётарди. Сув бўлмагандан сўнг, ҳеч қандай экин кўкармайди-да. Депутатлардан оқова сув масаласида амалий ёрдам беришларини сўрадик. Қисқа фурсатда илтимосимиз қондирилди. Эндиликда бемалол деҳқончилик қилишимиз мумкин. Бунинг учун депутатлардан миннатдормиз.

Сайфулла ИКРОМОВ,
“XXI asr” мухбири

КОНИМЕХДА ЯНА БИР ТАДБИР

Яқинда Навоий вилоятининг Конимех туманида O‘zLiDeP вилоят Кенгаши томонидан “Мамлакат тараққиётининг янги босқичида кўппартиявийлик тизими: O‘zLiDeP нуқтаи назари” мавзусида илмий-амалий семинар ўтказилди. Тадбирда маҳаллий Кенгаш депутатлари, партия фаоллари, тадбиркор ва фермерлар иштирок этди.

Сўзга чиққанлар   ижти­моий ҳаёт сиёсий институтлар ва фикрларнинг хилма-хиллиги асосида ривожланиши, унинг моҳияти кўппартиявийлик тушунчаси билан мутаносиблигини таъкидлаб, бунинг учун мамлакатимизда етарлича шароит яратилганини эътироф этдилар. Шунингдек,  партияларнинг тарихи, йўналиши бўйича турлари, давлат бошқаруви ва жамият сиёсий тизимини шакллантиришда сиёсий партияларнинг вазифалари тўғрисида маълумотлар берилди.

– Бугунги семинардан ўзимизга керакли бўлган жуда кўплаб маълумотларни олдик, – дейди O‘zLiDeP Конимех туман бўлими аппарати раҳбари Гулсара Бекмуродова. – Ушбу билимларни ҳаётда қўллаш орқали ўз ҳудудимиздаги сиёсий таъсир доирамизни кучайтириб олишимиз мумкин.

Тадбир иштирокчилари семинар давомида ўзларини қизиқтирган саволларга батафсил жавоб олишди.

Қобил АСТАНОВ,
O‘zLiDeP вилоят Кенгаши бўлим мудири

15 НАФАР ЕТАКЧИ ЎРНИГА иқтидорли, ташаббускор ёшлар сайланди

НИҲОЯСИГА  ЕТАЁТГАН ҲИСОБОТ-САЙЛОВ ЙИҒИЛИШЛАРИ O‘ZLIDEP БОШЛАНҒИЧ ТАШКИЛОТЛАРИ ЛИБЕРАЛ-ДЕМОКРАТИК ҒОЯЛАРНИНГ ЖЎШҚИН ТАРҒИБОТЧИСИГА, ЖОЙЛАРДАГИ ИЖТИМОИЙ-ИҚТИСОДИЙ МУАММОЛАР ҲАЛ ЭТИЛИШИГА КЎМАК БЕРА ОЛУВЧИ ФАОЛ КУЧГА АЙЛАНАЁТГАНИНИ, ШУНИНГДЕК, ДАСТУРИЙ ҒОЯ ВА МАҚСАДЛАРИМИЗНИ ИЗЧИЛ ТАРҒИБ ҚИЛИШДА ПАРТИЯНИНГ
БИРОР БЎҒИНИ БПТЛАРДЕК КАТТА ИМКОНИЯТЛАРГА ЭГА ЭМАСЛИГИНИ ЯНА БИР КАРРА НАМОЙИШ ЭТДИ.

_______________________________

Бугунги кунда Қашқадарё вилоятида 22 минг 605 нафар маслакдошимизни жипслаштирган 916 та бошланғич партия ташкилоти фаолият кўрсатмоқда. Қуйи бўғинларнинг ҳисобот-сайлов йиғилиш­лари ошкоралик, ўз-ўзини танқид асосида бўлиб ўтгани эътиборга молик.

Абдулла Йўлдошев воҳада биринчилардан бўлиб партия сафига кирган ташаббускор инсонлардан. У Шаҳрисабз туманидаги “Паҳлавон” тиббий ташхис марказида иш юритаётган таянч тузилмага етакчилик қилаётир. 26 сафдошимизни бирлаштирган мазкур БПТ  нафақат туман, балки вилоят миқёсида ҳам энг намунали тузилмалардан биридир. Ҳисобот-сайлов давомида қайд этилганидек, ўтган даврда қуйи бўғин йиғилишларида ўндан ортиқ долзарб масала муҳокама этилиб, O‘zLiDeP туман Кенгашига тақдим этилган. Шунингдек, депутатлик назорати амалга оширилишига партиявий воситалар билан ёрдам берилган. Қуйи бўғин шу йўсинда аҳолини қийнаётган баъзи муаммолар ҳал қилинишига ҳисса қўшяпти. Фаоллар ғоявий-сиёсий тадбирларни ҳар жиҳатдан такомиллаштириш ишига ҳам сидқидилдан ёндошмоқдалар.

– Ўзбекистон Республикасини янада ривожлантириш бўйича Ҳаракатлар стратегияси партиявий ишни ташкил этишда ҳам дастуриламалдир, – дейди БПТ раиси.  – Унинг мазмун-моҳиятини электоратимиз вакилларига етказиш мақсадида турли тадбирлар ўтказяпмиз.  Ҳар ойда бўлиб ўтадиган йиғилишимизда тадбирлар натижаларини сарҳисоб қиляпмиз.

Илҳом Абдуллаев кўп йиллардан буён Касби тумани марказий шифохонасидаги қуйи ташкилотга раҳбарлик қиляпти. Ташаббускорлиги,  ташкилотчилиги билан ҳаммаслакларига ўрнак кўрсатяпти. Таъкидлаш жоизки, ҳисобот даврида қуйи бўғин сафлари кенгайиб, сифат таркиби яхшиланди. Сайловчилардан тушган мурожаатлар бўйича тегишли ишлар олиб борилди. Ўтган йили йигирмага яқин партиявий тадбир ташкил этилгани ва уларда мингдан ортиқ киши қатнашгани диққатга сазовор.

Шу билан бирга вилоятда партия сафига адашиб кириб қолган, зиммасидаги масъулиятни унутган БПТ раислари ҳам борлигидан кўз юммаслик зарур. Ҳисобот-сайловлар даврида 32 та қуйи бўғин етакчиси ўрнига янгилари сайланди. Улардан 17 нафарининг яшаш ёки иш жойи ўзгарган. 15 нафар қуйи бўғин етакчисига эса партиядошлар томонидан ишонч билдирилмади.

Хусусан, “Деҳқонобод калийли ўғитлар заводи” унитар корхонасидаги бошланғич ташкилотда 67 нафар партия аъзоси ҳисобда туради. БПТ етакчиси зиммасидаги вазифаларни сидқидилдан бажармаган, сафдошларини O‘zLiDeP нуфузини янада оширишга қаратилган ишларга бошлай олмаган. Қуйи бўғин фақат қоғозда “фаолият кўрсатган”. Ҳисобот даврида бу ерда бирор марта ҳам йиғилиш ўтказилмаган. Аъзолар сонини кўпайтиришга эътибор берилмаган. Ҳисобот-сайловда шу ва бошқа камчиликлар ошкора айтилиб, фаолиятни жонлантириш юзасидан чора-тадбирлар режаси белгилаб олинди. Ишчан, истеъдодли Меҳринисо Мелиева етакчиликка сайланди.

АТ “Агробанк” Ғузор туман бўлимида иш юритаётган таянч тузилма  фаолияти ҳам қониқарсиз деб топилди. Янги сайланган етакчи Маҳлиё Чориевага қуйи бўғин фаолиятини жонлантириш вазифаси топширилди. Шунингдек, тумандаги “Янги кент” ва “Чаноқ” маҳалла фуқаролар йиғинларидаги қуйи бўғинлар етакчилари ҳам  қайта сайланмадилар.

Қарши шаҳридаги “Хўжахиёл” МФЙ ҳудудида тузилган бошланғич ташкилот йиғилиш­ларни хўжакўрсинга ўтказган. Маҳаллада аҳоли бандлиги ва фаровонлигини ошириш билан боғлиқ ишлар қуйи бўғин назаридан четда қолган. БПТ билан партия маҳаллий Кенгаши орасида ҳеч қандай алоқа йўқ.

Таллимаржон шаҳарчаси Нишон туманининг чекка ҳудудида жойлашган. Шаҳарчада ўзига хос муаммолар талайгина. Аммо ҳудудда ташкил қилинган қуйи бўғин томонидан уларга жамоатчилик эътиборини қаратиш учун ҳеч қандай амалий иш қилинмаган. 53 аъзони бирлаштирган мазкур тузилмада йиғилишлар ўтказилмаган,  партия туман Кенгашига ҳеч қандай таклифлар, маълумотлар тақдим қилинмаган.  Тарғибот-ташвиқот ишлари ҳам деярли амалга оширилмаган. Ҳисобот-сайлов йиғилишида сўзга чиққанлар янги раис Шерхон Қораев маслакдошларни аниқ амалий ишлар, муваффақиятлар сари етак­лай олишига ишонч билдирдилар.

– Айрим бошланғич ташкилот хоналарининг партиявий тарғибот воситалари билан жиҳозланмагани, услубий қўлланмаларнинг етишмаётгани қуйи бўғинлар ишига салбий таъсир этмоқда, – дейди партия вилоят ташкилотининг БПТлар билан ишлаш гуруҳи раҳбари Алибек Раҳматов. – Бинобарин, ана шу масалани ҳал этиш учун аъзолик бадалларининг бир қисмини қуйи бўғинларда қолдириш мақсадга мувофиқ, деб ўйлайман. Умуман, муаммоларни кимдандир кўмак сўраб эмас, балки мавжуд имкониятлардан самарали фойдаланиб, билим ва тажрибани, интеллектуал қобилиятни ишга солган ҳолда бартараф этиш мақсадга мувофиқ.

O‘zLiDeP ҳудудий Кенгаши ташкилий-партиявий ишлар бўлими мудири Муҳиддин Ҳамроевнинг айтишича, эндиликда бошланғич ташкилотларда “Фаолият дафтари” юритиш йўлга қўйилиб, ўша дафтардаги қайдлар орқали ташкилот фаолия­ти атрофлича таҳлил этилади. Бу янгилик ҳам қуйи тузилмалар фаолияти мукаммаллашувига хизмат қилиши шубҳасиз.

Сайфулла ИКРОМОВ,
“ХХI asr” мухбири

... ҚУЙИ ТУЗИЛМАДАН БОШЛАНАДИ

Ховос тумани “Гулбаҳор” ШФЙ ҳудудида фаолият юритаётган бошланғич партия ташкилоти 2010 йилда ташкил этилган бўлиб, айни вақтда ўз атрофида 27 нафар маслакдошни бирлаштирган.

Ўтказилган навбатдаги ҳисобот-сайлов йиғилишида ўтган йили амалга оширилган ишлар ҳамда “Халқ билан мулоқот ва инсон манфаатлари йили”да мўлжалланган чора-тадбирлар режаси таҳлил қилинди.

Йиғилишда Президентимизнинг фармони билан тасдиқланган “2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси”ни амалга ошириш, “Халқ билан мулоқот ва инсон манфаатлари йили” Давлат дастурида белгиланган вазифалар ижросини таъминлашда партия олдида турган вазифаларга эътибор қаратилди. Зеро, ушбу вазифалар ижроси мамлакатимизда “Инсон манфаатлари ҳамма нарсадан устун” деган ғояни ҳаётга татбиқ этишда ҳал қилувчи аҳамиятга эга.

Йиғилиш сўнггида таянч тузилма фаолияти қониқарли деб топилиб, етакчиликка бир овоздан Илҳомжон Эгамов қайта сайланди.

***

АТ “Агробанк” Мирзаобод туман филиалидаги БПТ раиси М.Ярашева ҳисобот мажлисида сўзга чиқиб, бошланғич партия ташкилоти фаолиятини янада жонлантириш, аъзолар сонини  кўпайтириш лозимлиги ва бунга эришиш учун нафақат БПТ раиси, балки ҳар бир аъзолар ҳам масъул эканлигини таъкидлаб ўтди.

Тадбир якунида бошланғич партия ташкилоти фаолияти қониқарли деб топилиб, 2017 йил учун мўлжалланган иш режаси тасдиқланди.

***

Оқолтин тумани “Андижон” ҚФЙ ҳудудидаги бошланғич партия ташкилоти йиғилишида O‘zLiDeP мамлакатимиздаги етакчи партия сифатида сиёсий саҳнада ўз электорати – хусусий мулк эгаларининг интилишларини ифода этиши, кичик бизнес ва хусусий тадбиркорликни ривожлантириш учун қулай шароитлар яратиш учун партиянинг барча қуйи бўғинлари фаолиятини янада яхшилаб боришга алоҳида эътибор қаратиш лозимлиги таъкидланди.

Йиғилиш якунида бошланғич партия ташкилоти раислигига Сулаймон Равшанов  бир овоздан қайта сайланди.

***

Сардоба туманида 41 та бошланғич партия ташкилоти 948 нафар аъзони бирлаштирган. Улар туман Кенгаши билан ҳамкорликда партиянинг мақсад ва вазифаларини тарғибот-ташвиқот қилишда муҳим рол ўйнамоқда.

“Ота-юрт” МФЙ ҳудудидаги БПТ йиғилишида қайд этилганидек, 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси замирида мамлакатимизда олиб борилаётган ислоҳотлар самарадорлигини тубдан ошириш, давлат ва жамиятнинг жадал ривожланишини таъминлаш учун шарт-шароитлар яратиш, ҳаётнинг барча соҳаларини эркинлаштиришга қаратилган эзгу мақсадлар мужассам бўлганлиги кун сайин ўз исботини топиб бормокда.

Йиғилиш ниҳоясида қуйи ташкилот раислигига З.Тожиев қайта сайланди.

***

Гулистон шаҳрида таркибида йигирмадан зиёд корхоналарни бирлаштирган “БЕК” бирлашмасидаги бошланғич партия ташкилотининг навбатдаги ҳисобот-сайлов йиғилишида ҳам Ҳаракатлар стратегиясида белгиланган вазифалар аҳоли, айниқса, хотин-қизлар ва ёшлар бандлигини таъминлаш, тадбиркорликни ривожлантириш билан боғлиқ долзарб масалаларга эътибор қаратилди.

Маълумот сифатида айтиш керакки, мазкур бошланғич ташкилот  ташкил топган вақтда – 2014 йилда ўз сафига 110 нафар фаолларни бирлаштирган бўлса, айни вақтда уларнинг сони 550 нафарга етган.

Тадбирда сўз олганлар Ўзбекистон саноати тез суръатлар билан ривож­ланиб бораётгани, аҳолининг турмуш даражаси тизимли равишда ошаётганлигини таъкидлашди. Бу ютуқларнинг асоси мамлакатимизда хусусий мулк, тадбиркорлик ва ишбилармонликни изчил ривожлантириш учун қулай шароит ва имкониятларнинг яратилганлигидир.

Дилшод МАДРАҲИМОВ,
O‘zLiDeP Сирдарё вилоят
Кенгаши Ташкилий-партиявий ишлар
бўлими бош консультанти

ТЕГИШЛИ ХУЛОСАЛАР ЧИҚАРИЛДИ

Избоскан туманидаги Қорадарё-Майлисой ирригация тизимида иш олиб бораётган бошланғич ташкилотда бўлиб ўтган ҳисобот-сайлов йиғилиши ўзининг очиқлиги ва муҳокамаларга бойлиги билан кўпчиликда қизиқиш уйғотди. Йиғилишда мавжуд нуқсонлар, йўл қўйилаётган хатолар атрофлича сарҳисоб қилинди. Бугунги кунда партиянинг Избоскан туман Кенгашида 1100 дан зиёд аъзони ўзида бирлаштирган 36 та бошланғич партия ташкилоти фаолият юритмоқда. Йиғилишда партия сафига ташаббускор, ғайратли, жамиятимизда кечаётган жараёнларга бефарқ бўлмаган, эл корига камарбаста инсонларни янада кўпроқ жалб қилиш кераклиги алоҳида таъкидланди.

Ҳисобот-сайловда қуйи бўғин аъзолари, депутатлар, жамоат ташкилотлари вакиллари, тадбиркор ва фермерлар кун тартибидаги масалаларга муносабатларини билдирдилар. Ечимини кутаётган муаммолар бўйича аниқ ва асосли таклифларни илгари сурдилар.

Мажлисда бошланғич партия ташкилоти фаолиятига тегишли саволларга жавоблар берилди. Қуйи бўғин раиси олдига фаолиятни янада жонлантириш, эришилган натижаларга танқидий баҳо бериш каби топшириқлар қўйилди.

Пирвардида таянч бўғин фаолияти қониқарли топилиб, Музаффар Турғунов БПТ раислигига  қайта сайланди.





Зилола РАҲМОНОВА,
“ХХI asr” мухбири

ҲАВАСМАНДЛАРГА МАСЛАҲАТ БЕРИЛДИ

O‘zLiDeP  Наманган вилоят Кенгаши қошидаги Сиёсий таълим маркази ташаббуси билан  “Кичик бизнес ва хусусий тадбиркорлик – иқтисодий тараққиёт омили” мавзусида давра суҳбати ташкил этилди. Унга Наманган шаҳрида фаолият юритаётган тадбиркорлар ҳамда касб-ҳунар коллежларининг ишбилармонликка ҳавасманд  битирувчилари таклиф этилди.

– Мамлакатимизда яратилган қулай ишбилармонлик муҳити туфайли хусусий секторнинг иқтисодиётимиздаги аҳамияти ошиб бормоқда, – деди ўз сўзида партия  вилоят Кенгаши  раиси ўринбосари Иброҳим Саттаров. – Масалан, жорий йилнинг биринчи чораги якунларига кўра вилоятда рўйхатдан ўтган жами тадбиркорлик субъектлари сони 16 минг 650 тага етди. Январь-март ойларида 884 та янги кичик бизнес субъекти ташкил топди.

Вилоят солиқ, банк ва тадбиркорлар билан иш олиб борувчи бошқа тегишли идора, ташкилотлар мутахассислари йиғилганларга мустақил фаолиятда асқотиши мумкин бўлган йўл-йўриқ, маслаҳат ва тавсиялар бериб, саволларга батафсил жавоблар қайтардилар.

– O‘zLiDeP томонидан ўтказилаётган бундай тадбирлар ўз самарасини беряпти, – дей­ди  “Келажак таъмир савдо сервис” масъулияти чекланган жамияти раҳбари Ҳамидилла Ибрагимов. – Уч ой аввал шу сингари партиявий тадбирда музлатгич-сақлаш биноси қуриш учун ер майдони ажратилиши борасида ёрдам сўрагандим. Партия вилоят ташкилотининг изчил қўллаб-қувватлаши сабабли Наманган шаҳар ҳокимлиги томонидан менга бир гектар ер майдони ажратиш тўғрисидаги қарор қабул қилинди.

Комилжон ФАЙЗИЕВ,
O‘zLiDeP  Наманган вилоят
Кенгаши матбуот  хизмати ходими

АГАР ТАДБИРЛИ БЎЛСА...

Кўчиш

 

...Аёл чанг кўчага чиқариб қўйилган ўнтача тикув машинасига бир зум тикилиб қолди. Наҳотки шу ўнта дастгоҳ деб жонини жабборга бериб юрган бўлса?.. Ахир озмунча югурдими буларни сотиб олиб, ишни йўлга қўйгунга қадар? Сал бўлса-да, ишлар юришиб турган пайти ижарада турган бино бузилади, деб ўтиришибди. Ўзингники бўлмагандан кейин шу-да! Тўғри, унга муддатини сал аввалроқ айтишганди, лекин қисқа вақтда бошқа жой топишга улгурмади-да. Мана, экскаватор яқиндагина буюртмалар қабул қилиниб, иш қизғин кетаётган бинога қараб юришга чоғланди…

 

Аёл экскаватордан кўзини олиб, яна машиналарига қадалди.  “Наҳотки топгани шу ўнта машина бўлса?..” Хўрлиги келди унинг. “Ахир касбимга талаб катта эди-ку… Тинч­гина ҳисобчилигимни қилиб юрсам бўлмасмиди?.. Тадбиркорлик қилиб, оиламгаям, элимгаям нафим кўпроқ тегади, деб катта орзулар қилдимми ё…” Шундай хаёллар оғушида ўтирганида нарсаларини саранжомлаб келган қизлар атрофини ўраб олди. Ҳаммасининг нигоҳида бир савол: энди нима бўлади?

 

Гулбека опа уларга қараб, хаёлидан кечган ўйлардан уялиб кетди. Ўн-ўн беш нафар қиз шу ерда ишлаб, озми-кўпми рўзғорига қарашяпти, яна қанчадан-қанча қизлар ҳунар ўрганиб кетишди шу даргоҳда ахир! Шуларни ўйларкан, шаҳд билан ўрнидан туриб, қизларга “Ҳаммаси яхши бўлади, хотиржам бўлинглар!” деди. Лекин ҳали ўзи ҳам бу хотиржамлик қаердан келишини билмасди. Таниш-билишларига қўнғироқ қилди, у ёқ бу ёққа одам жўнатди. Натижа йўқ, машаққат билан ўзи танлаб-танлаб, авайлаб келтирган машиналари ҳамон кўчада. Устига-устак қоронғи тушиб қолаяпти, кўчада ишдан қайтаётган одамлар сони тобора кўпайиб бормоқда.

 

Бир пайт шу атрофда жойлашган корхона раҳбари уларнинг ёнига келиб, “Э, ҳалиям жой тополмадиларингми?”, деб сўраб қолди. Мунғайиб турган чеҳраларни кўриб, “ҳозир…”, деди-ю, қаёққадир қараб шошиб йўлга тушди. Кўп ўтмай тикув машиналари эскироқ, аммо озода бир бинога жойлашди. “Майли, шу жойдан фойдаланиб туринг, опа. Ахир шунча одам ишлаб турибди цехингизда…” Қизларнинг кўзида умид чақнади: “Буюртмаларимизни тикишга улгурамиз, опа!”

 

Ҳисобини тополмасанг…

 

– Бундан ўн йиллар аввал ички бозорни ўрганиш мақсадида тайёр кўрпача тикиб бозорга олиб чиққанимда, кўпчилик ҳайрон қолганди, – дейди Пастдарғом туманидаги “Бека Чарос” хусусий корхонаси раҳбари, вилоят Кенгашига партиямиздан сайланган депутат Гулбека Қўчқорова. – Аёллар охирги пайтларда фақат кўрпачани ўзлари тикаётувди, энди шуниям сотиб олишадими, деб юзимга ҳам очиқ айтишди. Бугун ҳар бир оила аъзолари янада яхшироқ шароитда яшашни истайди ва шунга яраша ҳаракат қиляпти. Хўш, аёллар янада сифатлироқ кўрпачаларни сотиб олиб ишлатса нима қипти, дедим. Ҳақиқатан ҳам кўп ўтмай, сотувга чиқарилган кўрпачалар тугаб қолди. Кейинги кунларда ҳам шундай бўлди. Асл касбим ҳисобчи бўлгани учун кетган харажат ва фойдани ҳисоб-китоб қилдим. Бозорда юриб, аҳолининг кийим-кечак борасидаги эҳтиёжларини чуқурроқ ўргандим. Иккита машинани олдиму, уйда, оилам билан рўзғор учун зарур бўлган турли анжомларни тикдик. Буюртмалар кўпая бошлади. Айниқса, корхоналар ишчиларига махсус, сифатли, замонавий кийимларга бўлган эҳтиёж катталигини билгач, машиналар ва тикувчи қизлар сонини кўпайтиришим кераклигини англадим. Хомашё сотиб олишим керак, бунинг учун банкдан кредит олиш имкони бор экан. Тадбиркорлик фаолиятимни бошлашим мумкинлигини тобора теранроқ ҳис қилардим. Ва ниҳоят оиламиз билан келишиб, шунга қарор қилдик...

 

Бугунги 50 нафарга яқин ишчи, шунча машиналар сотиб олиб, ўз биномизга эга бўлиб, бемалол ишлай олишимизга қадар қанча машаққатларни бошдан ўтказдик. Тадбиркор ҳар бир фаолиятини чуқур ҳисоб-китоб қилиб олмас экан, ишини доимий йўлга қўйиб олиши қийин кечади. Тўғриси, баъзида бугун очилиб, эртага ёпилиб кетаётган корхоналар, “тадбиркорлик қилиш қийин” дегувчилар ҳақида эшитарканман, уларнинг энг катта хатоси шу, деб ўйлайман. Сабаби, гарчи ўзим ҳам ҳисобчи бўлсам-да, бир-икки марта жуда қийин вазиятга тушиб қолганман. Қайсидир буюртмачилар ўз вақтида пулини ўтказиб бермаган, солиқ тўловлари эса кутиб турмайди. Корхонамиз ёпилиб кетишига жуда оз қолди. Қолаверса, мана шу, муқим биномизга эга бўлгунга қадар бешта жойга кўчиб ўтганмиз. Кўчиш жараёнларида машиналарнинг техник ҳолати анча абгор ҳолатга келиб қолади. Хуллас, бир сўз билан айтганда, тадбиркорлик кишидан ҳар томонлама тадбирлиликни талаб этади. Бу соҳанинг ёмғиру, дўлларига чидаган инсонгина ўз ишини ривожлантириши, бирор бир натижага эришиши мумкин.

 

Ҳунарлининг ғавғоси кам

 

Корхонада бугунги кунда 50 нафарга яқин хотин-қиз иш билан банд. Юзга яқин турдаги кийим-кечаклар, рўзғор учун зарур буюмлар буюртма асосида моҳир чеварлар томонидан тикилади. Уларнинг орасида коллеж битирувчилари 5-6 нафарни ташкил қиларкан. Битирувчиларнинг ишга жойлашиб, сўнг дарҳол турмуш қуриб кетиши тадбиркор учун бироз ноқулайлик туғдириши суҳбат жараёнида кўп таъкидланди. Тикувчилар томонидан касб сир-асрорлари энди ўргатилган пайти, уларнинг турмуш қуриши, оиласидагиларнинг эса ишлашига рухсат бермаслиги бу ерда тез-тез рўй берадиган ҳодиса. Гулбека опа депутат сифатида баъзи оилалардаги бундай муносабат нотўғри эканини нафақат ўз корхонаси, балки жойларда бўлган учрашувларда ҳам бот-бот такрорлайди.

 

– Қиз боланинг касби, ҳунари бўлиши оиласи учун фақат фойда, – дея суҳбатни давом эттиради опа. – Турмушидан ажралган, ёки оилавий ҳаётда қийналган аёллар орасида мендан иш сўраб келганлари жуда кўп. Улар орасида тикувчиликни ўрганиб, уйида тикиш-бичиш қилиб, оилавий ҳаётини тиклаб олганларига ҳам гувоҳ бўлганман. “Қанийди ўз вақтида касб-ҳунар эгаллаганимизда бунчалик қийналмасдик”, деб ўз хулосаларини айтган аёллар қанча.  Ҳатто бир марта жуда оғир аҳволда ёрдам сўраб келган бир аёлга шу ерда тикувчиликни ўргатдик, ҳаёти изга тушиб кетди. Яқинда уни учратиб қолганимда ўзини анча тутиб олганини кўриб, рости қувондим. “Агар ўша пайти ёрдам бермаганингизда ҳеч кимга керакмасман, деб ўзимни…”, дея хўрсиниб қўйди. Бугунги турмушидан хурсандлигини айтди. Мамлакатимизда қизларнинг таълим олиши-ю, ҳунарли бўлиши учун қанча шароитлар яратилаётгани бежиз эмаслигини  кўп таъкидлайман.

 

Бугун Гулбека Қўчқорова “Тадбиркор аёл” Ўзбекистон ишбилармон аёллар уюшмасининг туман бўлимини ҳам бошқариб келмоқда. Ишбилармон аёлларга ўз тажрибасидан келиб чиққан ҳолда зарур тавсиялар бермоқда, уларни истиқболли ишларга йўналтираяпти. Бир нечта тадбиркор хотин-қиз аллақачон опанинг маслаҳати билан ўз ишини йўлга қўйиб олди. Тумандаги 400 нафарга яқин фаол аёлларни жамлаш, уларнинг сафини кенгайтириш ва фаолиятини янада мустаҳкамлаш мақсадида семинарлар ўтказиб бориш эса жорий йилдаги асосий режалардан биридир.

Гулруҳ МЎМИНОВА

Саҳифа 1 - 123

Joomla