Ishbilarmon, mardlik va shijoat sohibi, azmi qat`iy, tadbirkor va hushyor bir kishi ming-minlab tadbirsiz, loqayd kishilardan yaxshidir

Абдулла Арипов ЎФА фаолиятини қониқарсиз деб баҳолади

Абдулла Арипов ЎФА фаолиятини қониқарсиз деб баҳолади

Бугун, 22 апрель куни Вазирлар Маҳкамасида Ўзбекистон спортидаги мавжуд муаммолар ва Токио Олимпиадасига тайёргарлик масалаларига бағишланган селектор йиғилиши бўлиб ўтди,деб хабар бермоқда Tribuna.uz.

Olamsport`нинг ёзишича, йиғилишда бош вазир Абдулла Арипов ва асосан олимпия оиласига мансуб спорт федерациялари раҳбарлари иштирок этган.

«Бош вазир миллий олимпия қўмитаси фаолияти, спортчиларимизнинг Токио-2020 Олимпиадаси лицензиялари йўлидаги кураши ва бошқа қатор масалаларни кескин танқид остига олди», – дейилади хабарда.

Жумладан, Абдулла Нигматович Олимпиадага бир йилдан сал кўпроқ вақт қолган бир пайтда бор йўғи иккита лицензия қўлга киритилгани, бундан тўрт йил аввал худди шу вақтда лицензиялар сони 10тадан ошиқ бўлганини алоҳида урғулаган.

Ўз навбатида, 17та истиқболли олимпия спорт турлари федерациялари раҳбарлари асосий лицензион турнирлар олдинда эканлиги, Токио-2020 учун камида 100та лицензия қўлга киритилишини айтишган.

Шунингдек, Абдулла Арипов федерацияларни марказлашган ҳолда молиялаштириш масаласи Миллий олимпия қўмитаси зиммасида қолиши, лекин бу жараён жиддий назорат қилиниши, спортчиларнинг йиллик тақвимга киритилган нуфузли мусобақалардаги иштироки таъминланишини айтган.

Ҳукумат раҳбари ўтган ҳафта МОҚ президенти этиб сайланган Рустам Шоабдураҳмоновга бошқарув тизими ва кадрлар масаласини қайта кўриб чиқиш вазифасини топширган.

Селектор йиғилишида Ўзбекистон футбол ассоциацияси фаолиятига ҳам тўхталинган. Абдулла Арипов ассоциация фаолияти қониқарсиз ҳолатда эканлиги, ислоҳотларга муҳтожлигини алоҳида таъкидлаган.

Эслатиб ўтамиз, Арипов жорий йил январь ойидан буён Жисмоний тарбия ва спортни ривожлантириш жамғармаси раиси ҳам саналади.