Энди ташкилотларга пахта толасини сотиб олишда ҚҚС амалдаги сотиш нархидан келиб чиқиб ҳисобланади
Ўзбекистон Республикаси президенти “Тўқимачилик ва тикув-трикотаж саноатининг экспорт салоҳиятини оширишга қаратилган ислоҳотларни янада чуқурлаштириш чора-тадбирлари тўғрисида”ги қарорни имзолади.
Ҳужжат билан белгилаб қўйилишича, 2019 йил ҳосилидан бошлаб республика ташкилотларига пахта толасини сотиб олишда қўшилган қиймат солиғи пахта толасининг жаҳон бозорларда шаклланган нархлардан қатъий назар амалдаги сотиш нархидан келиб чиқиб ҳисобланади, деб ёзилади Kun.uz тарқатган хабарда.
Ўзбекистон Республикаси Солиқ кодексининг самарасиз солиқ ва божхона имтиёзлари ва преференцияларни бекор қилиш бўйича янги таҳрирдаги лойиҳасини мувофиқлаштирувчи ишчи комиссия (Мавлонов) Ўзбекистон Республикаси Солиқ кодексининг янги таҳририга ушбу қарорда назарда тутилган қоидалар киритилишини таъминлайди.
Ўзбекистон Республикаси Молия вазирлиги Давлат солиқ қўмитаси билан биргаликда бир ой муддатда тадбиркорлик субъектларининг товар айланмасидан вужудга келган ноль ставкадаги қўшилган қиймат солиғини корхоналарга қайтариш тўғрисида тақдим қилган аризаларини қабул қилиш бўйича автоматлаштирилган дастурини ишлаб чиқади ва амалиётга татбиқ этади.
Ўзбекистон Республикаси Вазирлар Маҳкамаси:
уч ойлик муддат давомида комплекс ёндашув асосида хом ашёни қайта ишлаш, тайёр маҳсулотни ишлаб чиқариш ва экспорт қилиш бўйича, шу жумладан, саноат кооперациясини кенгайтириш ҳамда қўллаб-қувватлаш асосида тўқимачилик маҳсулотлари учун ички ва ташқи бозорларда тадқиқотлар ўтказиш;
ички ва ташқи бозорларда маҳсулотлар рақобатбардошлигини таъминлаш бўйича чора-тадбирларни амалга ошириш, ягона қўшимча қиймат занжирини яратиш бўйича;
республикада ишлаб чиқариладиган пахта ип-калаваларни бутун ҳажмини қайта ишлаш ҳисобига 2025 йилга қадар тўқимачилик маҳсулотлари экспортини 7 млрд. АҚШ долларига етказишни назарда тутувчи “2019-2025 йиллар давомида тўқимачилик ва тикув-трикотаж саноатини жадал ривожлантириш Концепцияси”ни тасдиқлайди.
