Вазирлар Маҳкамасининг фармойишига асосан Ватанимиз мустақиллигининг
27 йиллигига бағишлаб Халқаро жанг санъати ассоциацияси, Фарғона вилоят ҳокимлиги,
Ўзбек жанг санъати федерацияси ҳамкорлигида Фарғона шаҳридаги “Истиқлол” стадионида халқаро жанг санъатлари фестивали ўтказилди.
Нуфузли тадбирга дунёнинг 30 дан ортиқ мамлакатидан 150 дан зиёд спортчи, 500 дан ортиқ жанг санъати мутахассислари, тажрибали мураббийлар иштирок этишди. Меҳмонлар Марғилон шаҳрида тантанали кутиб олингач, вилоятнинг диққатга сазовор жойларига саёҳат уюштирилди.
Маълумот ўрнида айтиш керак, ўзбек жанг санъати федерацияси расман 2009 йилнинг апрель ойида иш бошлаганига қарамай, ўша йилнинг ўзида WoMAU – Бутунжаҳон миллий жанг санъатлари уюшмасига аъзо бўлди. 2010 йилда эса миллий спортимизни дунё миқёсида янада оммалаштириш мақсадида WASCO – Бутунжаҳон яккакураш спорт турлари ташкилоти билан ҳамкорлик ўрнатилди. Айни пайтда юртимизда 40 мингга яқин йигит-қиз 400 дан зиёд мураббий ва мутахассисдан ўзбек жанг санъати сирларини ўрганмоқда.
Халқимизнинг миллий кийими – яктакда майдонга чиқаётган спортчилар дарров эътиборни тортади. Оппоқ либоснинг ёқаси Ватан байроғи рангларида ҳошияланган. Кўкрак қисмида озодлик тимсоли – қанот ёзиб парвозга шайланган Ҳумо қуши акс эттирилган. Яктакнинг орқа томонида Самарқанддаги Шердор мадрасаси пештоқидаги тасвир – куч-қудрат узра офтоб нур сочмоқда. Унинг атрофига айлана шаклда “Ўзбек жанг санъати” сўзлари битилган – ҳаммаси ўзимизники, миллийликка хос.
Ўзбек жанг санъати федерацияси вакиллари Жаҳон жанг санъати уюшмасининг фаол аъзоси сифатида нуфузли халқаро мусобақаларда фахрли ўринларни эгаллаб келаётгани ҳам кўпчиликка маълум. Халқаро жанг санъати фестивалига мезбонлик қилиш ҳуқуқи Ўзбекистонга берилгани ҳам ана шу эътирофнинг амалдаги тасдиғидир.
Фестиваль доирасида ЮНЕСКО ҳомийлиги остида Бутунжаҳон жанг санъатлари уюшмаси (World Martial Arts Union) Бош ассамблеясининг 17 йиғилиши ҳам ўтказилди. Унда жаҳон жанг санъатлари уюшмасига аъзо 26 та давлат вакиллари қатнашдилар. Шунингдек, “Жанг санъати ва Ипак йўлидаги маданият” мавзусидаги академик семинарда “Жаҳон жанг санъатлари тарихи”, “Ипак йўли ва жанг санъати”, “Урушлар ва маданиятлар алмашинуви”, “ЮНЕСКО ва номоддий маданий мерос” каби масалалар бўйича атрофлича маълумотлар берилди.
– Ўзбекистонга биринчи келишим, – дейди АҚШ вакили Намсу Хёнг. – Жуда меҳмондўст, замонавийлик ва тарихийлик уйғунлик касб этган мамлакат экан. 2009 йилдан бери ўзбек жанг санъати билан танишман. Унинг ўзига хослиги ва бетакрорлиги одамни оҳанрабодек ўзига тортади.
Уммонлар оша кўҳна юртимизга етиб келган мутахассис-меҳмоннинг самимий фикрларига қўшимча қилиш ортиқча, назаримда.
Ўзбек жанг санъати деб аталмиш янги спорт турининг асосий ғояси сифатида халқимизнинг юксак маънавияти, бой тарихи, ўлмас қадриятлари, ҳар томонлама соғлом авлодни тарбиялаш бобидаги анъаналари ўзак-негиз қилиб танланганининг шарофати бу. Ўзбек жанг санъати билан шуғулланадиган ўғил-қизлар, энг аввало, уларга устозлик қиладиган мураббийлар камтаринлик, ҳалоллик, сабрлилик фазилатларига эга бўлиши, ҳар қандай ҳолатда ўзини назорат эта олиши ва руҳан бақувватлик қатъий талаб қилиб қўйилганининг натижаси бу.
Хулоса қилиб айтганда, Фарғонадаги халқаро фестиваль ўзбек жанг санъати навқирон авлод вакилларига кўплаб эзгуликлар ва қувончларни ҳадя эта олишининг, миллий спортимизни жаҳон аҳли эътироф этаётганининг яна бир исботи бўлди.
Озод РАЖАБОВ,
“XXI asr” мухбири
