Ishbilarmon, mardlik va shijoat sohibi, azmi qat`iy, tadbirkor va hushyor bir kishi ming-minlab tadbirsiz, loqayd kishilardan yaxshidir

Шавкат Мирзиёев Қорақалпоғистон Республикасида: аҳоли қандай фикр билдирмоқда?

Шавкат Мирзиёев Қорақалпоғистон Республикасида: аҳоли қандай фикр билдирмоқда?

Президентимиз Қорақалпоғистон Республикасига жорий йил январь ойида ташриф буюрган эди. Орадан ўн бир ой ўтиб давлатимиз раҳбари яна Оролбўйига келди. Ўтган шу давр мобайнида Шавкат Мирзиёев раҳнамолигида ушбу ҳудудда амалга оширилган оламшумул ишлар аҳоли кайфиятини кўтариб, уларни янги марралар сари илҳомлантирмоқда.

ЎзА мухбири улардан айримларининг фикрларини келтириб ўтди.

Абдулла Каримов, Элликқалъа туманидаги «Сорибий лимонария» хусусий корхонаси раҳбари:

- Давлатимиз раҳбари жорий йилнинг январь ойида Қорақалпоғистонга ташрифи чоғида берган топшириқлар ижросини кўриб қалбимизда ифтихор туйғуси жўш урмоқда. Жорий йил сентябрь ойида корхонамиз ишга тушди. Корхонада тиббий муолажалар учун кислород ишлаб чиқарилади. Бугун мамлакатимизда тадбиркорлар учун кенг имкониятлар яратилмоқда. Айниқса, Президентимизнинг ташаббуси билан яратилган қулайликлар бизни янги марралар сари илҳомлантирмоқда. Давлатимиз раҳбарининг тадбиркорликка тўсиқ бўлиш давлат сиёсатига қарши туриш билан баробар, деган сўзларини ҳар бир тадбиркорлик субъектлари пештоқига осиб қўйса арзийди.

Дилфуза Хўжанова, Қорақалпоғистон Республикаси Мактабгача таълим вазирлиги Чимбой тумани бўлимининг нодавлат мактабгача таълим муассасалари шўъба мудири:

- Президентимизнинг туманимизга ташрифи доирасида мактабгача таълим муассасалари фаолияти билан танишгани соҳага қаратилаётган катта эътиборнинг яна бир ифодаси бўлди. Давлатимиз раҳбари ўзининг чиқишларида нодавлат мактабгача таълим муассасалари фаолиятини такомиллаштириш бўйича кўп бора таъкидламоқди.

"Нодавлат таълим хизматлари кўрсатиш фаолиятини янада ривожлантириш чора-тадбирлари тўғрисида"ги қарорида соғлом рақобат муҳитини шакллантириш учун анъанавий таълим хизматлари билан бир қаторда таълим олишнинг сифатли ва оммабоп муқобил имкониятларини яратадиган пуллик таълим хизматлари кўрсатиш бозорини жадал ривожлантириш кўзда тутилган. Бугун бу борада кенг кўламли ишлар амалга оширилмоқда. Энг асосийси сифатли таълим ва тарбия тизими йўлга қўйилмоқда.

Инжигул Ўтарова, уй бекаси:

- Давлатимиз раҳбари Шавкат Мирзиёевнинг Президентлик лавозимига киришганига мана бир йил бўлди. Ўтган шу бир йил давомида жуда кенг кўламли ишлар амалга оширилганини ҳаётимизда кўриб, оммавий ахборот воситалари орқали танишиб бораяпмиз.

Президентимиз ўзлари бош бўлиб, халқ билан мулоқот қилмоқда, аҳоли дардини эшитиб, уларнинг муаммоларига ечим топмоқда. Биргина Нукус шаҳрида амалга оширилган ишларни санаб адоғига етиб бўлмайди. Бугун шаҳар бутунлай ўзгариб кетди. Олис Мўйноқ туманида яшайдиган қариндошлар билан гаплашганимизда, Президентимиз ўз сўзининг устидан чиқиб, у ерга тоза ичимлик суви олиб борганини фахр ва чуқур миннатдорлик билан тилга олишади. Бу каби эзгу ишларни кўплаб келтиришимиз мумкин.