Ishbilarmon, mardlik va shijoat sohibi, azmi qat`iy, tadbirkor va hushyor bir kishi ming-minlab tadbirsiz, loqayd kishilardan yaxshidir

Тоғорада гиёҳванд моддаси парваришлаш усули фош бўлди

Тоғорада гиёҳванд моддаси парваришлаш усули фош бўлди
Деновлик фуқаро гиёҳванд модда парваришлашнинг антиқа йўлини ўйлаб топибди. 
 
Сурхондарё вилояти Денов туманида ўтказилган “Қорадори-2019” тезкор тадбири чоғида тумандаги “Лолазор” маҳалласида яшовчи Панжи Чориев (исм-шарифлар ўзгартирилди) гиёҳванд модда парваришлашнинг антиқа йўлини ўйлаб топганига дуч келинди. Унинг яшаш уйи кўздан кечирилганда ҳаммом ичидаги тоғорада парваришлаб келаётган беш туп наша ўсимлиги тегишли тартибда расмийлаштирилиб олинди.
 
Вилоят ички ишлар бошқармаси хабарига кўра, Денов тумани Гулобод маҳалласида ўтказилган тадбирда шу маҳаллада яшовчи 77 ёшдаги Санам Холбоева томорқасида 27 туп кўкнори гиёҳванд ўсимлигини экиб, парваришлаётгани аниқланган. Мазкур тумандаги Даҳана маҳалласида яшовчи 49 ёшдаги Пўлат Самиевнинг томорқасида етиштирилаётган 13 туп наша ўсимлиги ҳам тегишли тартибда ҳужжатлаштириб олинган.
 
– Жойларда ҳуқуқбузарликлар профилактикаси ва жиноятларнинг олдини олишга қаратилган тадбирлар доирасида гиёҳванд моддаларни етиштириш, сақлаш, сотиш каби ҳаракатлар учун жиноий жавобгарлик белгилангани кенг тушунтирилаётган бўлса-да, айрим шахсларнинг бундай қалтис ишга қўл ураётгани ачинардилир, – дейди вилоят ички ишлар бошқармаси матбуот хизмати раҳбари, капитан Ф.Тошбоев. – Вилоятда олиб борилаётган тезкор тадбирлар чоғида қалтис ишга қўл ураётган бундай шахсларнинг сири очилиб қолмоқда. Масалан, Бойсун туманидаги Чилонзор маҳалласида ўтказилган тадбирда Раим Пўлатовнинг томорқасида икки туп кўкнори гиёҳванд моддаси, Денов туманидаги Дахана маҳалласида Соҳиб Тўраев томорқасида икки туп наша ўсимлигини парваришлаётганида қўлга тушиб қолди. Шу тумандаги Буюк ипак йўли маҳалласида яшайдиган Эркин Тўлаев томорқасидаги маккажўхори ўсимлиги орасида бир туп наша гиёҳванд моддасини етиштираётгани аниқланиб, ҳужжатлаштириб олинди.
 
Айни пайтда заҳри қотил етиштиришни касб қилмоқчи бўлган бу шахсларга Ўзбекистон Республикаси Жиноят кодексининг тегишли моддаси билан жиноят иши қўзғатилиб, тергов ҳаракатлари олиб борилмоқда.


Холмўмин МАМАТРАЙИМОВ, ЎзА