Ishbilarmon, mardlik va shijoat sohibi, azmi qat`iy, tadbirkor va hushyor bir kishi ming-minlab tadbirsiz, loqayd kishilardan yaxshidir

Йиллар давомида йиғилган муаммо бир кунда ҳал бўлганида эди...

Йиллар давомида йиғилган муаммо бир кунда ҳал бўлганида эди...
Маълумки, газетамиз саҳифаларида O‘zLiDeP Сиёсий Кенгаши Ижроия қўмитаси ва партия ҳудудий ташкилотлари ходимлари, депутатлар, 
БПТ етакчиларидан ташкил топган ишчи гуруҳларининг вилоятларда олиб борган қизғин фаолияти мунтазам ёритиляпти

   881 та масалага ечим топилди
 
O‘zLiDeP Сиёсий Кенгаши Ижроия қўмитаси ва партия Наманган вилоят, туман, шаҳар кенгашлари масъул ходимлари, депутатлардан ташкил топган ишчи гуруҳлари аъзолари вилоятдаги 4 минг 800 та хонадонда бўлиб, аҳолининг яшаш шароити, тадбиркор ва фермерлар фаолияти билан яқиндан танишиб чиқдилар. 
 
Аҳоли, хусусан, тадбиркорлар, фермерлар ва деҳқон хўжаликлари раҳбарларини қийнаб келаётган 100 дан ортиқ муаммо жойида бартараф этилди. Ҳар бир туман ва шаҳардаги 20 тадан корхона, ташкилот, тадбиркорлик субъектлари, фермер хўжалик­лари фаолияти ўрганилиб, аниқланган камчилик ва нуқсонлар ҳамда қонунбузилишлар тўғрисида мутасадди идораларга депутатлик сўровлари киритилди.
Уйма-уй юриш асносида партия­миз вакиллари турли соҳаларга тааллуқли 2586 та масалани қайд этдилар.  Ишчи гуруҳлар одамларни асосан нималар ташвишга солаётгани борасида муайян хулосалар чиқарди. Газ, электр, ичимлик суви таъминоти билан боғлиқ 1009 та, ички йўллар таъмирталаблигига тегиш­ли 465 та, бандлик бўйича 106 та, банк кредити олиш ва тадбиркорлик фаолиятида учраётган 316 та, тиббий хизматга доир 85 та муаммо ҳисобга олинди. Эътиборлиси, 881 та масала ишчи гуруҳлари саъй-ҳаракатлари туфайли ечимини топди.  Қолганларини ҳал қилиш юзасидан депутатлик назорати йўлга қўйилди. 
–  Кўчамиздаги 87 та хонадонда 508 нафар фуқаро яшайди, – дейди Чуст туманидаги “Шербилак” МФЙга қарашли Наврўз кўчасида истиқомат қилувчи Жабборхон Нодиров. – Ичимлик суви танқислигидан жуда қийналяпмиз. Устига-устак, оқар сув ҳам деярли йўқ. Ариқларимизга баҳор ойларида 1-2 маротаба сув келади, холос. Томорқалардаги ернинг умри беҳуда ўтяпти. “Халқ қабулхонаси”га икки бора мурожаат қилдик, бироқ натижа бўлмади.  
Тилга олинган кўчада яшовчи 4 нафар кишига уй-жой қуриш учун ер ажратиш тўғрисида туман ҳокимининг қарори чиққанига тўрт йилдан ошган. Аммо уларга ҳануз ер берилгани йўқ. Бундан ташқари, Шербилак маҳалласида яшовчи 8 фуқаро Ўзбекистон Республикаси фуқаролигини олиш масаласида талай мушкулотларга дуч келяп­тилар.  
Мазкур муаммолар юзасидан туман Кенгашидаги O‘zLiDeP депутатлик гуруҳи аъзолари тегишли идораларга депутатлик сўрови йўлладилар. 
Ишчи гуруҳлар партия дастурий ғоя ва мақсадларини, юртимизда кечаётган туб ислоҳотлар моҳиятини  тарғиб қилиш мақсадида кўплаб хусусий корхоналар, уюшма ва бирлашмалар, хўжаликларда ҳам бўлдилар. Суҳбатлар чоғида электоратимиз вакиллари нафақат айрим муаммоларни баён қилдилар, балки уларнинг ечими бўйича ҳам таклиф-мулоҳазаларини ўртага ташладилар. 
“Наманганбалиқсаноат” МЧЖ раҳбари Равшан Абдуллаевнинг айтишича, соҳада малакали мутахассисларнинг етишмовчилиги тобора кучлироқ сезиляпти. Айниқса, балиқчиликни интенсив шаклда ташкил қилиш бўйича қарийб ҳеч қандай тажриба йўқ. Анъанавий усулларда фаолият юритадиган балиқчилик хўжаликлари эса мавжуд имкониятлардан тўла фойдалана олмаяптилар. Унинг фикрига кўра, аҳволни ўнглаш учун балиқчиликка ихтисослашган хўжаликлар раҳбарлари, ишчи-хизматчиларини мазкур соҳа ривожланган Япония, Вьетнам, Хитой, Жанубий Корея сингари давлатларга сафарга жўнатиш лозим. Улар бу мамлакатлардан илғор технологияларни ўрганиб қайтадилар. Ўзбекистон фермер, деҳқон хўжаликлари ва томорқа ер эгалари кенгаши, Савдо-саноат палатаси ва  “Ўзбалиқсаноат” уюшмаси ана шу ишларга бош-қош бўлишлари мақсадга мувофиқ. Яна бир масала. Бугунги кунда балиқчилик хўжаликларига банклар томонидан юқори фоизли кредитлар ажратиляптики, бу соҳа ривожига хизмат қилмайди, албатта. Балиқчилик билан шуғулланувчиларга имтиёзли шартларда сармоялар берилишига эришиш лозим. Зеро, бу соҳа, айниқса, замонавий интенсив услублар катта маблағларни талаб қилади. Соҳанинг жадал ривожланишига халақит бераётган омиллардан яна бири шуки,  ҳозирда республикамизда буғдой очиқ биржа савдолари орқали сотиляпти. Бу эса ем нархининг қимматлашишига ва ўз навбатида балиқ маҳсулотлари нархининг ҳам ошишига олиб келяпти. Буғдойнинг муайян қисмини ем ишлаб чиқарувчиларга давлат томонидан арзонлаштирилган нархларда сотилиши муаммонинг энг мақбул ечимидир.
“Наманган чорва насл маркази” корхонаси бошлиғи Комилжон Холиқов ҳам  чорвачилик, наслчилик соҳасини такомиллаштиришга доир асосли таклифларини билдирди.  Мамлакатимизда чет давлатлардан қорамол олиб келинишига кўмаклашувчи логистика марказларини барпо қилиш, чорвачилик бўйича етук мутахассислар тайёрловчи ўқув мас­канлари очиш шулар жумласидандир. 
Ишчи гуруҳлари ана шу ва бошқа таклифларни жамлаб, парламент қуйи палатасидаги фракциямизга тақдим этиш борасида иш олиб боряптилар. 
– Қиш­лоқлар­даги ҳар бир оиланинг ўртача 10 сотихдан томорқаси бор, – дейди ишчи гуруҳ аъзоси, партия Сиёсий Кенгаши Ижроия қўмитаси ходими Севара Муслимова. – Лекин ҳанузгача айрим хонадонларда деҳ­қончилик мада­нияти оқсаётгани ғоятда ачинар­лидир. Баъзилар бўш томорқаси бўла туриб, бозор­­даги сотувчининг қўлига қараб яшаяпти. Томорқа эгалари замон талабига янгича ёндашиши, рўзғори обод­лигини таъмин­лаши, оилавий қўшимча даромад ман­баи­ни шакллан­тириши, фар­занд­лари келажаги йўлида саъй-ҳа­ра­кат­лар қилиши зарур. Шундан келиб чиқиб, биз ҳар бир туманда энг намунали томорқа ва кўп тармоқли фермер хўжаликлари соҳиблари билан учрашувлар ташкил этдик. Бундай мулоқотларда томорқа хўжалигини юритишни мақсад қилган одамлар ўзларини қизиқтирган саволларга жавоб топишди.  
Шу билан бирга ишчи гуруҳлар томонидан партиянинг туман ва шаҳар кенгашлари фаолияти танқидий йўсинда кўриб чиқилди. Партия маҳаллий кенгашларининг моддий-техник аҳволини яхшилаш, партия аъзолари сафини кенгайтириш, бошланғич партия ташкилотлари сонини  кўпайтириш, уларни тарғибот материаллари билан таъминлаш, O‘zLiDeP депутатлик гуруҳлари фаоллигини ошириш борасида қилинаётган ишлар атрофлича ўрганилди. Шу масалаларга бағишланган йиғилишлар ўтказилиб, партия фаолларининг таклифлари асосида бажарилиши зарур вазифалар белгилаб олинди.
                Одамларни рози қилиш осон эмас
O‘zLiDeP Сиёсий Кенгаши Ижроия қўмитаси ҳамда партия Фарғона вилоят, туман ва шаҳар кенгашлари ходимлари, депутатлар, бошланғич партия ташкилотлари етакчиларидан ташкил топган ишчи гуруҳлар томонидан ҳудуддаги 6708 та хонадонда ўрганишлар олиб борилиб, турли йўналишлардаги 2532 та муаммо аниқланди. Уларнинг 1610 таси тегишли ташкилотлар ва депутатлар ёрдамида ўша ернинг ўзида ҳал этилди.
Партиямиз вакиллари саъй-ҳаракатлари туфайли “Миллий банк”нинг Фарғона шаҳар филиали билан шартнома тузилиб, Зоҳиджон Ҳакимов раҳбарлигидаги “Қувончбек Зоҳиджон фермаси” МЧЖ томонидан Фарғона шаҳри “Бешбола” маҳалла фуқаролар йиғини ҳудудида яшовчи етти оилага “Ҳар бир оила – тадбиркор” Давлат дастури доирасида қўй парваришини йўлга қўйишларига кўмаклашилди. 
– Бир ой муқаддам O‘zLiDeP Фарғона шаҳар Кенгаши ходимлари маҳалламизда семинар ўтказишганди, – дейди Қумариқ кўчасидаги 9-уйда истиқомат қилувчи Хадича Камолова. – Мулоқот чоғида фаолларга ҳовлимда қўй боқиш ниятим борлигини айтиб, бу борада улардан кўмак сўрагандим.  Очиғи, истагим бу қадар тез амалга ошишини кутмагандим. Маҳалламиздаги яна олти оиланинг қувончи чексиз. 
Шу маҳаллада яшовчи Зайнабхон Собированинг оиласи 6 кишидан иборат. Сафдошларимиз ушбу хонадонда бўлишганида “Ерни боқсанг, ер сени боқади”, деган нақл бежиз айтилмаганига яна бир бор ишонч ҳосил қилишди. Ҳар бири 4 сотихдан иборат 2 та иссиқхонада булғор қалампири етиштирилиб, бозорга чиқариляпти. Миришкорларга “O‘zLiDeP кутубхонаси” рукни остида чоп этилган, иссиқхоналарда турли сабзавотлар парваришлашга доир йўл-йўриқлар баён қилинган қўлланмалар топширилди. 
Ишчи гуруҳлар ташаббуси билан тажрибали деҳқонлар иштирокида 19 та маҳорат дарси ташкил қилиниб, унда 804 нафар томорқачи иштирок этгани ҳам эътиборга молик. Шунингдек, томорқадан фойдаланиш бўйича 20 мингга яқин буклет тарқатилди.
Партиямизнинг барча бўғинлари фаолияти дастурий мақсадларимиз ҳамда давлатимиз раҳбари томонидан белгилаб берилаётган вазифаларни ҳаётга изчил татбиқ қилишга қаратилган. Жамият ҳаётининг барча жабҳаларини қамраб олувчи мазкур вазифалар ижросини наинки партия фаоллари, балки кенг жамоатчиликнинг фаол иштирокисиз тасаввур қилиш қийин. Шу нуқтаи назардан ёндашилганда, бугун халқ ичига янада фаолроқ кириб бориш, одамларга олдимиздаги мақсадлар, уларни амалга ошириш йўллари ва кутилаётган пировард натижани муфассалроқ тушунтириш, шу орқали хайрихоҳларимиз, ҳаммаслакларимиз сафини янада кенгайтириш ҳозирги босқичда партия тузилмалари олдидаги энг муҳим вазифага айланган. Унинг нечоғли муваффақиятли амалга оширилиши эса омма орасида, одамлар билан юзма-юз иш олиб борувчи таянч бўғинларга ҳам боғлиқ. Зеро, ҳар бир қуйи ташкилот партия электорати вакилларини бирлаштирувчи ўзига хос майдондир. У сайловчилар билан партия ўртасидаги кўприк, ижтимоий-сиёсий фаолият ўзагидир. Бинобарин, O‘zLiDeP қуйи бўғинларни янада кўпайтиришга, улар фаолияти самарадорлигини оширишга алоҳида эътибор қаратяпти.  Ишчи гуруҳлар партия бошланғич ташкилотлари тузилмаган фермер хўжаликлари, тадбиркорлик субъектлари, кластерлар, уюшмалар, ассоциацияларга кириб борди. Турли-туман ташкилотларда сиёсий куч дастурий ғоялари тарғиб қилиниб,  партия таянч нуқталарини ташкил қилиш бўйича тизимли иш олиб борилди.  9 та хусусий корхона, 4 та фермер хўжалиги, республика фермер, деҳқон хўжаликлари ва томорқа ер эгалари кенгашининг 3 та бўлими ва бошқа 14 та ташкилотда бошланғич партия ташкилотлари иш бошлагани саъй-ҳаракатлар бесамар кетмаганини англатади.
Фарғона вилоятида 1037 та маҳалла фуқаролар йиғини бор. 481 нафар МФЙ раиси ва 403 нафар котиб O‘zLiDeP аъзоларидир. Олиб борилган таъсирчан тарғибот ишлари натижасида ўзини ўзи бошқариш органларининг 100 дан зиёд ходими партия сафига ўтиш истагини билдирди.
Олтиариқ туманидаги “Юлдуз” болалар оромгоҳида “Бизнинг энг катта таянчимиз ва суянчимиз, ҳал қилувчи кучимиз – ёшлар!” шиори остида ёшлар форуми кўтаринки руҳда ўтказилди. Форумда O‘zLiDeP Сиёсий Кенгаши Ижроия қўмитаси ходимлари, Олтиариқ тумани ҳокимлиги, корхона, ташкилотлар вакиллари, депутатлар ва ёшлар иштирок этдилар. Форум доирасида ёшлар ўртасида спорт мусобақалари, тасвирий санъат, мусиқа ва бошқа йўналишлар бўйича беллашувлар ўтказилди.
– Президентимиз томонидан ижтимоий, маънавий-маърифий соҳалардаги ишларни янги тизим асосида йўлга қўйиш бўйича илгари сурилган бешта муҳим ташаббус барчамиз учун дастуриламал вазифасини бажармоқда, – дейди ишчи гуруҳ аъзоси, O‘zLiDeP Сиёсий Кенгаши Ижроия қўмитаси аппарати раҳбари Жамолиддин Мелибоев. – Мазкур ташаббуслар мазмун-моҳиятини жамоатчиликка етказиш, истеъдодли ёшларни излаб топиш, уларнинг салоҳиятини рўёбга чиқаришга кўмаклашиш ишчи гуруҳлар зиммасига юклатилган асосий вазифалардан бири ва биз уни астойдил бажаришга интиляпмиз. 
Ёшлар форуми доирасида бешинчи ташаббус – хотин-қизлар бандлигини таъминлаш бўйича Олтиариқ туманидаги “Фромода текстиль” ва “Олтиариқ” хусусий корхоналари томонидан ўнлаб хотин-қизлар ишга жойлаштирилиб, уларга меҳнат дафтарчалари берилди. Шунингдек, ўнлаб ёшларга партия сафига қабул қилинганлиги тўғрисида гувоҳномалар тантанали равишда топширилди. 
 Сиёсий қарашларимни O‘zLiDeP орқали ифодалашга қарор қилдим. Чунки мен мамлакат қудрати, халқ фаровонлиги тадбиркорлар, фермерларнинг нечоғли самарали фаолият юритиши билан чамбарчас боғлиқ, деган қатъий фикрдаман. Партия дастурий мақсадлари амалга ошишига қўлимдан келганча ҳисса қўшаман, – дейди Фарғона политехника институти магистранти, “Ҳумо” ўқув маркази раҳбари Исмоилжон Обичаев. 
Ишчи гуруҳ томонидан инвестиция лойиҳалари амалга оширилиши билан боғлиқ ишларга ҳам алоҳида эътибор қаратилди. Вилоятда 79 та лойиҳа ишга туширилган, 562 таси эса шу йилнинг охирига қадар ҳаётга татбиқ қилиниши белгиланган. Мазкур лойиҳаларга вилоят Кенгашидаги депутатлардан 19 нафари ҳамда  туман ва шаҳар Кенгашидаги депутатлардан 213 нафари бириктирилган бўлиб, бугунги кунгача улар ижросини таъминлаш юзасидан назорат-таҳлил фаолияти амалга оширилиб, мансабдор шахсларнинг эшитувлари ўтказилди.
                 Ишонч қозониш машаққати
Партиямиз вакилларининг 
Андижон вилоятидаги учрашувлари, аҳоли билан очиқ мулоқотлари 
1460 та муаммонинг юзага чиқишига 
туртки бўлди. Вилоятнинг барча 
туман, шаҳарларидаги 6223 та 
хонадонда аниқланган  масалаларнинг 524 таси жойида партиявий воситалар орқали ҳал қилинди. 
 
– Масалан, хонадонлардаги суҳбатлар давомида кредит олиш истагидаги андижонликлар 139 нафарни ташкил этиши маълум бўлди, – дейди ишчи гуруҳ аъзоси, O‘zLiDeP Сиёсий Кенгаши Ижроия Қўмитаси масъул ходими Сардор Марипов. – Улар орасида бу борада кимга, кайси ташкилотга мурожаат қилишни билмаётганлар ҳам борлиги ва уларга ишчи гуруҳимиз томонидан берилган тавсия ва кўникмалар, маслаҳатларнинг асқотгани бизнинг ютуғимиз бўлди, айни пайтда партиямизга нисбатан ишонч янада мустаҳкамланди. Шу кунга қадар уларнинг 29 нафари кредит олишга эришиб, тадбиркорликнинг турли йўналишлари бўйича фаолият бошладилар. 
Бу йўналишдаги ишларни биргина Қўрғонтепа тумани мисолида кўриб чиқиш мақсадга мувофиқ. Ишчи гуруҳ ташрифи давомида кредит олиш истагидаги хотин-қизларнинг 13 нафари жами 540 миллион кредит олишга муваффақ бўлгани амалий кўмакнинг ёрқин ифодаси бўлди. Зарнигор Исмоилова ана шундай омадлиларнинг бири. У раҳбарлик қилаётган “Оила равнақ” масъулияти чекланган жамиятида трикотаж маҳсулотлари ишлаб чиқарилади. 
– Фаолиятимни бошлаганимга 10 йилга яқин вақт бўлди, – дейди тадбиркор.– Ўтган йиллар давомида, очиғи, бундай имкониятдан фойдаланмаганман. Партия вакилларининг беминнат кўмаги билан эндиликда фаолиятимни кенгайтиришга эришаман. Бизнес лойиҳамда кўрсатилган 64 миллион сўм кредит маблағи ишлаб чиқариш ҳажмининг, сифат кўрсаткичининг ортишига, янги иш ўринлари яратилишига хизмат қилади. 
Шунингдек, хайрли ишлар тумандаги “Khontex Group” масъулияти чекланган жамиятида ўтказилган бизнес-экскурсия сифатида давом этди. Корхонанинг қулайликлари, яратилган имкониятлар бу ердаги бўш ўринларнинг 14 таси банд этилишига сабаб бўлди. 
Ўрганишлар мобайнида вилоятдаги 320 та корхона, ташкилот ва муассасаларда ўтказилган тарғибот-ташвиқот тадбирлари жорий йилда бажарилиши режалаштирилган инвес­тиция лойиҳаларининг депутатларга бириктирилиши, шу билан бирга улар фаолияти устидан депутатлик назорати ўрнатилиши учун замин яратди. 
Вилоятнинг Балиқчи, Избоскан, Пахтаобод ҳамда Шаҳрихон туманларида бўлиб ўтган “Томорқа – даромад манбаи” мавзусидаги тажриба алмашув семинарлари, маҳорат сабоқлари бу йўналишдаги ишларни янада такомиллашитиришга хизмат қилди. Бир парчагина еридан самарали фойдаланаётган, мўл ҳосил олиб оиласига, ички бозорга ва ҳатто ташқи бозорга ҳам манфаат келтираётган хонадон соҳиблари – миришкор деҳқонлар намунаси боқимандалик кайфиятидан чиқиб кетолмаётган айрим хонадон эгаларига ибрат сифатида кўрсатилиб, маънавий ва амалий кўмак берилди. 
Якка муаммолар умумий муаммоларни келтириб чиқаради. Дастлаб бир одам кўтарган масала эртага бутун бошли маҳалланинг, ҳудуднинг муаммосига айланиши мумкин. Жалақудуқ туманининг Бойчеки маҳалласи аҳли қоронғи тушиши билан зим-зиё зулмат остида қолгандек ҳис қиладилар ўзларини. Бирор зарурат бўлмаса кеч тушганда кўчага чиқмай қўяверадилар. Негаки, кўчаларни ёритувчи на бир чироқ бор, на бир ёриткич. Қуруқ симёғочлардан нур таралмайди-да! Ишчи гуруҳнинг ташрифидан маҳалла аҳли қувониб кетди. “Сен қил, у қилсин! Унинг иши, бунинг вазифаси!” деган иддаоларга жойида чек қўйилди. Бугун маҳалла аҳли симёғочларга қўйилган ёруғлик манбаларидан хурсанд.
Маълумки, чекка ҳудудларга табиий газ тармоқлари тортилмаган. Бу борада муаммолар истаганча топилади. Шаҳрихон туманидаги ўрганишлар натижасида 12 та хонадондаги ана шу масалага ечим топилди. “Андижон газ таъминоти” ХТГБ Шаҳрихон туманлараро 6-участка бўлимига халқ депутатлари Шаҳрихон туман Кенгаши депутати Шавкатбек Отахонов томонидан юборилган депутатлик сўрови муаммони осонгина ҳал қилди. 
– Газ баллонларига бўлган эҳтиёжимизни бир неча марта маҳалла фуқаролар йиғинига айтдик, - дейди Мустақиллик маҳалласида яшовчи Шоҳистахон Мамажонова. – Лекин фойдаси бўлмади. Очиғи, моддий имкониятимиз етарли бўлганда, амаллаб топардик. Яхшики, партия ходимлари, депутатлар “муаммоингизни айтинг” деганлари. Уларга раҳмат, газ баллонига бўлган эҳтиёжимиз тез фурсатда қондирилди.
O‘zLiDeP Андижон вилоят Кенгаши мафкуравий тарғибот-ташвиқот ишлари бўлими мудири Муяссархон Умурзақованинг таъкидлашича, ишчи гуруҳнинг келиши, ўтказилган тадбирлар натижасида партия сафига яна 635 нафар аъзо қабул қилинган. Демак, улуснинг партияга ишончи ортаётгани қувонарли.
 
O‘zLiDeP ҳудудий ташкилотлари 
маълумотлари асосида тайёрланди.